Ayera tardi Stichting Monumentenfonds Aruba (SMFA) a anuncia e ganadornan di e competencia di Wiki Loves Monuments Aruba 2022.
Wiki Loves Monuments ta un proyecto internacional y tin como meta documentacion di monumentonan rond di mundo. E participantenan no solamente ta participa den e competencia pa gana, pero nan ta contribui tambe na yuda documenta monumentonan di Aruba y comparti esakinan cu mundo.
Esaki ta edicion number 6 di Wiki Loves Monuments Aruba y edicion number 12 di e proyecto internacional. E aña aki Aruba a conta cu un total di 144 potret y 39 pais a participa den e competencia.
Un total di 10 potret a wordo nomina y e 10 potretnan aki lo sigui participa den e competencia internacional di Wiki Loves Monuments. E resultado di esaki lo ta conoci fin di januari 2023.
E competencia ta consisti di dos categoria. Categoria 2 ta potretnan di monumentonan no proteha, e categoria aki ta yuda e fundacion mira for di bista di e publico kico nan mes ta considera cu tin un balor monumental. Categoria 1 ta e categoria di potretnan di monumentonan proteha.
E aña aki ta prome biaha cu e potretnan di tur dos categoria por sigui den e competencia internacional. Añanan anterior e potretnan di categoria 1 so por a continua den e competencia internacional.
Tres hurado tabata encarga pa scoge ken ta e ganadornan den ambos categoria. Den categoria 2 e ganador tabata Dyanne Lopez Schipper cu su potret di un cas di torta y den categoria 1 e ganador a keda den persona di Jeroen Lucas, cu su potret di California Lighthouse.
