Siman pasa un hoben – conoci riba rednan social pa yuda cachonan cu ta riba caya – a pone algun imagen di cachonan morto laga riba un piedra na Calabas, Jaburibari. Bon Dia Aruba a yega di skirbi riba e asunto aki unda cu aparentemente pa varios aña caba tin hende mata y keda pone cachonan morto riba un baranca na Calabas. Bon Dia a bolbe tira un bista algun dia pasa y topa cu tres cacho morto riba otro na un baranca den e area.

Den 2014 nos a publica cu tin un persona cu ta matando cachonan y poniendonan riba un piedra na Jaburibari segun informacion cu nos a haya for di habitantenan den e area. Un di e habitantenan den e area a bisa nos e tempo ey cu e nos a ta kende ta laga e cachonan morto eynan pero den tur su añanan cu e ta bibando eynan esaki ta e caso. E ta un situacion hopi horibel segun e habitantenan a describi na Bon Dia e tempo ey, caminda tin cachonan ta wordo laga morto ey riba te ora cu nan rementa y yena e area cu muska.

Siman pasa un hoben conoci riba rednan social pa yuda cachonan riba caya, a post un video y algun potret caminda por a wak dos cacho morto banda di otro riba e baranca aki. Esaki a genera un ola di reaccion riba rednan social di hende puntrando kico a bay robes akinan. Bon Dia a bay e siguiente dia di e post anto topa cu un otro cacho banda di e otro dos cu tabata tin caba na e baranca. Nos a mira cu net dilanti di esaki tin un cas – cu ta mustra basta neglisha – caminda tin 5 pa 6 cacho cu ta sali for di e cura y blaf hende.

Nos no a logra combersa cu e persona cu ta biba den e cas aki, pero si cu un homber cu ta bisa di ta ruman homber di e persona cu ta biba akinan. E homber ta bisa nos cu e cachonan ta di su ruman homber, e no ta papia cu ne y ta pensa cu ta kisas otro hendenan ta venena su cachonan y pone nan riba e baranca. Segun Cuerpo Policial a informa nos den 2014, nunca nan a yega di tende keho for di e area aki tocante e asunto ki pero cu en todo caso e ta algo cu ta castigabel pa ley.