Ainda cantidad di trahado di Aura casino ta na cas y sin entrada

Apesar di tur esfuerso cu a wordo haci, ainda tin un cantidad di trahadonan di Aura casino na cas, sin cu nan lo wordo aloca a lo menos den un trabou temporal.

Esaki ta un preocupacion cu presidente di FTA, sr. Hubert Dirksz a declara na Bon Dia Aruba, ya cu ainda no tin un claridad riba un operador nobo di e casino aki, y cu  alrededor di 40 trahado no ta trahando actualmente.

“Aura casino ta sin operador te ainda. E trahadonan casi tur ta na cas sin trabou, apesar di tur esfuersonan haci”, el a bisa.

Preocupacion

Tanto Asociacion di Casino, Minister di Labor y tambe Departamento di Progreso Laboral (DPL) a purba di yuda e trahadonan di e casino menciona, pero nan tin un grupo grandi di trahadonan na cas y sin entrada. Pero loke ta preocupante ta cu no tin un fecha ainda ki dia e casino ta bay habri y kende ta e operador.

“Esey ta di lamenta y nos ta kere cu ley mester wordo cambia pa preveni sorto di situacionnan”, e lider sindical a bisa.

DPL y registracion

E sindicalista a tuma nota cu DPL a haci un yamada pa e trahadonan cu ainda no a registra pa busca trabou pa bay DPL, ya cu si nan no ta registra dificilmente nan por yuda e trahadonan cu ainda no tin trabou.

El a bisa cu realmente tin un cantidad di trahado di Aura casino cu no a registra na DPL. E ta lamenta e situacion aki pasobra mientras cu nan no a bay registra, nan ta na cas sin entrada cu ta un preocupacion grandi.  E ta haya cu e trahadonan aki pa un motibo of otro nan a keda sin bay DPL, pero FTA sa cu tin algun cu a bay y nan a keda mal contento pasobra nan no a haya e preferencia pa wordo atendi y tambe pa haya un trabou.

FTA  tin pensa di tuma contacto cu DPL y cu e trahadonan di Aura casino, y e sindicato ta bolbe haci un yamada na e trahadonan pa por fabor bay registra.