reunion operador nobo aura casino.JPG

Awe tin un reunion na oficina di mediador di Gobierno cu lo aclaria e situacion laboral di e trahadonan di Aura Casino. Den e reunion aki e operador nobo di e casino hunto cu sindicato y cu intermediacion di sr. Anselmo Pontilius como Mediador di Gobierno, lo presenta y debati riba e lista di e 25 trahadonan cu lo sigui traha cu nan fei di un total di 34 Tur dos partido ta di acuerdo riba e cantidad di e 25 trahado cu ta bay drenta traha. Mediador di Gobierno a recomenda mesora pa nan pone nomber, fam y funcion di e trahadonan aki pa tur hende sa. Esaki ta trece claridad pa e sindicato cu ta representa e grupo di trahadonan aki. Pero di otro banda nan lo wordo trata e asunto riba con lo para cu e otro trahadonan cu no lo sigui traha den Aura Casino, con lo ta nan areglo di pago y alternativanan di trabou pa nan.

Sr. Pontilius a laga sa cu paso significativo a wordo duna pa trece un solucion pa e trahadonan aki, pero no tur cos ta cla ainda. Tanto FTA como e operado cu a drenta pa opera e casino pa un periodo di 10 aña tabata combersando caba no formalmente riba e impacto di locual mester bira un acuerdo. Loke si nan a ricibi ta un carta oficial di e operador nobo di e casino den cua nan ta informa bou cual condicion nan lo opera e casino. Tambe nan lo desea pa Mediador di Casino brinda su intermediacion pa asina nan lo por yega na un acuerdo cu FTA.

Den e reunion di awe tardi nan tin algun puntonan masha specifico cu nan lo por resolve preto riba blanco cu intermediacion di Mediador di Gobierno. Nan lo mester yega na un acuerdo ainda riba e suma di placa cu mester wordo paga di e salario retroactivo. Pero tambe e tipo di compensacion mester regla pa e trahadonan cu no ta sigui den e casino den su fase nobo. Sr. Pontilius ta asumi cu di parti di e sindicato y e operador nobo di e casino nan lo tin nan punto di bista riba con e acuerdo final lo mester ta. “Nos lo t’ey pa mira con nos lo por yuda y recomenda con por sali”, el a bisa. E ta haya cu un noticia positivo tin di haber cu por lo menos 25 trahado lo por sigura nan cupo di trabou, considerando cu fei luna di december ultimo cu Aura Casino a cera e trahado a pasa den un calvario.

Mundo di casino 

E situacion den mundo di casino no ta facil ya cu tin cambio radical cu ta tumando luga, y e caso di Aura ta gewoon un ehempel. Considerando nos industria turistico y e sector di casino cu ta opera riba nos isla, sr. Pontilius ta haya cu nos mester ta prepara pa futuro con nos lo bay atende cun’e. E mundo di casino no ta mas manera 5 pa 10 aña pasa, ya cu un mercado importante tabata e Venezolanonan cu a mengua y cu nos lo mira nan activo den e actividad aki den corto plaso. Di otro banda no necesariamente e generacion mas jong cu ta bin como turista ta interesa pa gamble den casino. Encuanto si e ta premira cu e capitulo di Aura Casino finalmente lo wordo cera, sr. Pontilius a indica cu ainda tin asuntonan pendiente pa atende cun’e aki tin pasonan positivo. Un di nan ta cu e operador nobo a firma un acuerdo preliminar cu e hotel pa nan opera pa 10 aña locual ta un bon noticia. Awor loke ta importante ta e acuerdo cu ambos partido meste cera pa e 25 trahadonan cu lo sigui traha. Pero di otro banda ta un capitulo amarga den sector di casino den cual e trahadonan ta Sali e gran perdedo. “No ta e prome biaha cu nos ta mire. Ya cu tin varios situacion den cual operadonan ta sali bay…”, segun sr. Pontilius. Na manera di conclusion riba e reunion cu lo tuma luga awe entre operador nobo di e casino den ex Occidental Hotel (Barceló Hotel) y sindicato FTA, Mediador di Gobierno a indica cu ta dos punto cu nan ta bay trata pa cera e capitulo aki cu ta e lista di e trahadonan cu lo sigui y e areglo financiero pa e trahadonan aki. Tambe nan ta bay manda un carta na minister di Labor pa recorda su persona cu finalmente esun cu tin e licencia di e casino tin cu keda responsabel pa e trahadonan. Tambe ta importante pa garantisa cu tin fondonan disponibel ora cu ta cuminsa opera e casino. Y tambe analisa e futuro di e casinonan den nos industria turistico, no solamente preveni sino prepara e trahadonan pa e retonan cu tin nos dilanti.

LEAVE A REPLY

Please enter your comment!
Please enter your name here