Cientificonan ta bisa cu a haya un abundancia di particula chikito di plastic den sneeuw artico, indicando cu e asina-yama microplastic ta absorbi den atmosfera y hiba distancia largo te skina remoto di nos planeta.
E investigadonan a examina sneeuw colecta di sitionan den Artico, nort Alemania, Alpe Suiso y Bavaria, y e isla den lama nort Heligoland, cu un proceso specialmente diseña pa analisa nan muestranan den un laboratorio.
“Mientras cu nos a spera di haya microplastic, e concentracion enorme a sorprende nos”, segun Melanie Bergmann, investigado na Alfred-Wegener-Institute na Alemania.
Nan hallazgo a keda publica ayera den e journal Science Advances.
Estudionan anterior a haya microplastic – crea ora materialnan traha pa hende ta kibra, y defini como piesanan mas chikito cu 5mm – den aire di Paris, Tehran y Dongguan, China.
E investigacion a demostra cu e fragmentonan por bay den aire den un forma similar na stof, pollen, y e materia di particula fini di e gas di escape di vehiculo.
Sinembargo, cientificonan ainda mester determina ki efecto e particulanan minusculo aki tin riba hende of bida salvahe.
Bergmann, co- autor di e estudio, a bisa cu e concentracion mas halto di microplastic a wordo haya den Alpe Bavario, unda un muestra tabatin mas di 150,000 particula pa 1 liter.
Den averahe, investigadonan a haya 1,800 particula pa liter den e muestranan tuma den Artico.
Martin Wagner, biologo di Universidad Noruego di Ciencia y Tecnologia, kende no a participa den e estudio, a bisa: “Importante ta cu e estudio ta demostra cu transporte atmosferico ta un proceso relevante moviendo microplastic rond, potencialmente na un escala global. Ademas, sneeuw por ta un reserva importante wardando microplastic y liberando esaki ora e smelt, algo cu no a mira anteriormente.”
Bergmann a bisa cu e microplastic haya den e estudio tabata inclui esmalte cu por a wordo uza riba auto y boto, rubber haya den taira, y materialnan cu por a origina den tela of packaging.
E autornan a sugeri cu distribucion aereo di particula di microplastic te awo a keda neglisha como fuente di contaminacion, y mester wordo monitorea den schema standard pa monitor contaminacion di aire.
