Ayera mainta trahadonan di departamento di Jeugd Gezondheidszorg (JGZ) cu ta resorta bou di Salud Publico (DVG) a entrega un manifiesto na Minister Dangui Oduber expresando preocupacionnan specifico di e edificio na unda nan ta traha actualmente y edificio unda nan lo mester bay.

Edificio nobo
Minister Dangui Oduber a reuni dia 5 di juli ultimo cu sindicato TOPA y tambe algun trahado di JGZ pa asina atende cu entre otro  e topico di mudamento pa un edificio nobo y a splica e trahadonan kico gobierno lo bay haci. E edificio caminda JGZ tawata ubica ta den un estado di decadencia y 8 aña largo nada a wordo haci pa percura pa e trahadonan tin un espacio adecuado pa nan por eherce nan trabou. Di hopi tempo a busca un luga adecuado y apropia pa e trahadornan y a splica nan tambe e proceso cu ta andando.

E trahadonan a presenta un edificio caminda nan ta desea di wordo ubica y kier obliga gobierno pa pone nan den e edificio aki. Gobierno na su turno a busca diferente opcion y na final a bin cu un solucion di un edificio cu ta beneficia no solamente e trahadonan di JGZ, pero tambe e cliente nan y gobierno den tur sentido.

No por ta asina cu un trahado ta determina unda e ta bay sinta, den cua edificio y cu cua condicion. Mas ainda ora ta trata di forsa pa bay den un edificio cu ta hopi mas costoso pa Land Aruba y pagado di belasting.

Semper ta keda na e dunado di trabou pa determina kico ta bira e luga di trabou. Tur hende por tin nan deseo pero tur hende mester keda responsabel den nan actonan y accionnan. Gobierno ta esun encarga y autorisa pa tuma decision ariba huur di edificio. Gobierno a sondea un luga adecua y den su derecho a tuma e decision y a informa JGZ cu nan lo bay den un edificio adecua y apropia. Trahadonan mes a tuma contacto e siman aki ainda cu e doño di e edificio y sa cu tur e trabounan ta andando. Gobierno ta den fase final di e proceso  pa drenta un edificio nobo.

Vacuna
Ta importante pa nos comparti informacion corecto cu pueblo cu dunamento di vacuna no tin absolutamente nada di haber cu un edificio of luga di traha. Dunamento di vacuna ta wordo duna pafo di oficina sea na scolnan of na Wit Gele Kruis.

“Cu esaki como minister mi no por compronde pakico nan kier stop di duna vacuna si e vacuna ta wordo duna pafo di oficina.  Un empleado publico t’ey pa sirbi interes di pais Aruba. No por ta asina cu ta pone trabou abou y entre otro keda sin duna vacuna pasobra no por warda riba terminacion di e edificio cu ta wordo ingericht riba deseo nan di e trahado nan. Nos a compromete cu lo tin un bon edificio pa nan por haci nan trabou y nos ta cumpli cu esaki tambe.”