Ayera a sali un carta di despacho di director di Salubridad Publico, drs. Jerry Staring, cu den poco tempo a causa bastante rumor y emocion. Hopi persona a tuma e carta aki como un alerta real manera den caso di un peligro inminente. Tumando bon nota di loke ta aparece den e carta, nos ta interpreta esaki como un notificacion cu, mirando e serie di teremoto na Puerto Rico recientemente, a dicidi di parti di Direccion di Salubridad Publico pa a traves di e crisisteam, haci preparacion pa un eventual tsunami.

Esaki relaciona cu e hecho cu Bureau Rampenbestrijding Aruba (BRA) a anuncia cu pa Aruba lo tin un alerta vigente.

Relaciona cu esaki ta duna e siguiente ‘tips’ na e ciudadano pa nan seguridad y como preparacion pa un eventualidad:

  • Si bo mester di medicamento (diariamente), anto percura pa bo tin suficiente medicamento na bo disposicion;
  • Percura pa bo tin suficiente cuminda y bebida den stock;
  • Percura pa un lugar sigur pa bo reuni bo famia (y bo animalnan di cas).

Alavez ta pidi cooperacion di tur ciudadano si un miembro di e team di crisis acerca nan.

Segun nos opinion, esaki no tin nada di haci cu un alerta berdadero di un tsunami, sino simplemente e preparacion general cu mester tuma lugar pa por enfrenta un eventual fenomeno asina.

Clave den henter e asunto aki ta: kico ta un tsunami?

Un tsunami ta un serie di ola gigantesco, cu ta producto di un teremoto cu ta tuma lugar bao superficie di lama, o di un erupcion volcanico bao superficie di lama. Un tsunami por yega na ola cu altura di 10 – 30 metro o mas y ta inunda costa te na un cierto punto, dependiendo di e topografia local. Si ta trata di un costa halto, anto e olanan no ta yega leu den interior. Den caso cu tin un costa cu pa por ehemplo un o mas kilometro bay paden ta tereno plat, anto e olanan lo por penetra bastante leu den interior.

Na Aruba e zonanan mas vulnerable ta e zona costero, di Arashi te San Nicolas, cu pa gran parti ta tereno na nivel di lama, y cu pa un parti ta saliña, cu facilmente ta keda inunda den caso di un tsunami. Tur e areanan mas paden cu ta na altura di 40 – 50 metro o mas, no lo conoce peligro di tsunami asina facil.

Nos ta spera di nos autoridadnan involucra cu den futuro lo duna mas informacion tambe di kico pa haci ora tin un alerta (real) di un tsunami. Move bay pa un area mas halto si bo ta biba cerca costa ta parce nos e medida mas sigur.

Reaccion di gobierno.
Di su banda, gobierno ayera a manda un comunicado aclarando cu no tin menasa di tsunami pa nos isla, alabes aclarando e motibo di e carta cu a circula durante dia di ayera.

Den e comunicado por a lesa lo siguiente:

“Gobierno di Aruba ta anuncia cu no tin menasa pa tsunami. Debi na e teremotonan na Puerto

Rico, nos mester ta prepara pa tur cos. Tambe pa un tsunami. Pa e motibo aki tambe a manda

un carta pa algun departamento critico, como procedura standard. No pa trece panico, sino

hustamente pa trece trankilidad cu nos ta prepara.

Den caso cu tin menasa di Tsunami pa Aruba, comunidad henter lo wordo avisa y pues e

alerta lo no wordo duna den forma di un carta.

Den e sigiente dianan lo duna mas informacion pa preparacion pa Tsunami.”

 

LEAVE A REPLY

Please enter your comment!
Please enter your name here