Presidente di Stichting Rancho, Clifford Rosa a laga sa cu nan fundacion ta cuminsa un aña 2020 hopi positivo. Un aña caminda nan ta bay ehecuta varios proyecto, entre nan riba tereno di educacion.

Den cuadro di esaki, dia 16 di januari venidero nan lo realisa nan prome actividad di aña 2020. E ta un charla educativo bou e nomber: Comunicacion Positivo entre Mayor y Yiu. Esaki ta wordo realisa danki na un aliansa entre Centro di Actividad Rancho y Tienda di Educacion. Nan lo bin cu e charla aki entre 7or y 8or anochi den nan Centro di Actividad Rancho.

Rosa a bisa cu e charla aki lo ta uno hopi special pasobra a base di encuestanan y informacion cu nan a yega di compila, ta mustra e necesidad pa inicia un proceso di educacion den e bario compleho aki cu tin su retonan social cune. E ta haya cu esaki ta un bon momento pa bin y aporta, intercambia y dialoga, educa y conscientisa bo mes riba tur locual Aruba tin pa ofrece.

Charla y bon comunicacion.
Ginelly Quandt, kende ta coordinador di Centro di Actividad di , a bisa cu den nan charla, nan lo trata diferente tema importante pa e mayornan, specialmente esun cu tin di haci cu comunicacion entre mayor y yiu. Otro tema tin di haci con pa scucha otro di un manera positivo. Y tambe con pa discuti sin pleita.

El a bisa cu Tienda di Educacion lo duna hopi ehempel con practica cada aspectonan aki diariamente cu bo yiu. E ta haya cu nan ta temanan al caso y cu lo contribui positivamente na e comunidad di Rancho y tur esunnan interesa tambe.

El a referi cu e iniciativa aki pa bin cu mas charla educativo ta producto di un encuesta cu nan a haci aña pasa. Nan a distribui varios encuesta den e bario cu na final a bin cu algun resultado clave. Un di nan ta cu tin hendenan den e bario di Rancho cu kier mira mas actividad pa muchanan y specialmente pa hobennan.

“Nos ta ripara cu tin biaha e hobennan ta bay den mal caminda,” el a declara. Na e manera aki nan kier wak con e informacion cu ta wordo duna pa medio di Tienda di Educacion tin su efecto positivo pa atende cu e sorto di topico aki, pa bin cu un miho comunicacion entre mayor y yiu.

Mas informacion.
Nan lo combina e charla aki cu ponemento di poster den e bario. E ta un idea cu nan ta bin pensado hopi riba dje con envolvi mas hende den e bario y mustra nan kico Stichting Rancho -cu a bin celebra su prome decada di existencia- ta bin realisando den bienestar di e bario historico aki.

“E biaha aki nos ta bay haci un promocion basta grandi den e bario,” el a bisa.

Ya caba nan a pone e prome borchi den e Hanchi di Construccion como un forma simbolico. Nan lo sigui pone mas borchi den e diferente hanchinan cu tin den e bario aki. E borchinan lo keda un luna largo pa expone nan informacion.

Nan a dicidi di bin cu e strategia aki pasobra tin biaha e informacion no ta yega cerca nan comunidad. E fundacion aki ta haya cu nan ta bin organisando actividad importante den beneficio di e bario, caminda ta importante e presencia y envolvimento di e mayornan y hobennan di Rancho. Un di nan ta e charla educativo di diahuebs proximo, cu ta contribui na un bon relacion entre mayornan y yiu, pero relacion familiar tambe cu mester ta miho den e bario.

Ginelly a indica cu esaki ta un forma pa por yega mas cerca e hobennan pero tambe e mayornan, y hende den general cu ta di bario y pafo di bario di Rancho, pa si nan mester di e tipo di ayudo aki pa facilita e bon comunicacion y relacion entre mayor y yiu.

E falta di bon comunicacion y relacion ta un problema latente den e bario aki, pero tambe den otro barionan rond di Aruba. E ta haya cu e muchanan di Rancho ta hopi vulnerabel pa bay den mal caminda y pa medio di e charla aki, Stichting Rancho ta purba di atende cu problema social den bario.

“Si bo mester di ayudo sea mayor, yiu of hoben di un manera of otro, akinan na Centro di Actividad bo por drenta y bo por haya ayudo,” Ginelly a bisa.

E proyecto aki relaciona cu charla di educacion nan tin pensa di hacie tur luna, caminda nan intencion ta di por traha cu diferente fundacion, entre nan fundacion Respeta Mi y Telefon Pa Hubentud. Cada luna lo tin un organisacion invita pa contribui cu Stichting Rancho den na centro di actividad.