Alex Croes di Giannis CBD Products a lanta caso contra aduana

Ayera mainta durante un conferencia di prensa, Alex Croes conhuntamente cu abogado Bryan Coffie a bin dilanti pa informa comunidad cu nan a lanta un caso contra Aduana.

Croes a splica cu esaki no ta prome biaha cu ta hiba caso na corte; tambe nan a haci’e anteriormente pa loke ta trata inspeccion di remedi, Ministerio Publico cu a acus’e penalmente di bende remedi como suplemento y awor cu Aduana tocante importacion. Esey ta e motibo di pakico nan a dicidi di bin dilanti pa splica e situacion cu nan ta enfrentando na e momentonan aki.

Croes a sigura cu dia 1 di maart a haci exactamente 22 aña cu el a bay corte pa prome biaha, y awo despues di 12 aña nan ta den mesun situacion un biaha mas: den un caso sumario cu a entrega contra Aduana. Pa dia 4 di mei nan mester presenta na corte pa 8:30 di mainta.

Croes a sigura cu semper e ta keda para riba e punto cu ta exigi nan pa tin un inspeccion di remedi y cu awor e ta yama IVA. “Si mi no ta importando remedi empaketa, kico mi ta bay na un inspeccion di remedi? Te awe nan no tin autoridad den ley pa dicidi kico ta of no ta un remedi, e ta competencia di minister di Salud Publico en cuestion, Dangui Oduber. Mientras tanto cu e no a apunta nada como remedi, mi no tin nada di haci den e departamento ey tampoco,” el a señala.

Esey ta e punto cu e ta sigui para riba dje te cu awe. El a conta cu su prome casonan tabata di comision di LAR, cu ora e ta haya e conseho cu nan a duna den e caso ey na e minister concerni, e ta keda un conseho p’e y si e no tuma e decision, e ora ey tin un caso den corte di LAR.

Si ta bay den LAR, el a splica cu hues tin cu declara e persona como no competente, debi cu a cana e caminda robes. Na momento cu el a gana e ultimo caso di LAR, cu tabata apelacion e minister na e momento ey, na 2006 a dicidi cu e ta haci e remedi pa ley. E tempo ey Croes a keh’e di abuso di poder, loke a origina un denuncia penal contra Croes riba e suplementonan, pa motibo cu a haci nan remedi pa ley “y e ora ey mi ta bendiendo remedi den mi negoshi como suplemento,” el a conta.

Igualmente e ta sigura cu el a lucha pa su derechonan cu tres prome minister diferente riba e tema aki y cu e ta sigui lucha cu cuatro si ta posibel tambe.

Na e momento ey el a bay contra Ministerio Publico ya cu e minister di Salud Publico den turno a apunta e suplementonan como remedi den un Ministeriële Regeling (MR) y minister di Husticia mester a firma, de lo contrario, e no ta bira ley.

A traha un ley di excepcion na un “derder”, cu den caso aki ta Croes su persona – un eerste ta un dokter y un tweede ta un boticario, derder ta Croes cu no ta ni boticario ni dokter, pero si un persona cu tin experiencia den materia aki – pa e haya un excepcion. Tempo cu a bay confisca den e tempo ey e tabatin un excepcion.

Despues dos minister a traha un MR nobo na maart di 2011 manera el a conta, esaki tabata mara na un tratado bilateral entre Reino cu Merca. Violacion di MR aki ta un violacion di un tratado bilateral. Croes ta sigui enfatisa riba e punto cu tin cinco componente apunta como remedi e tempo ey, Ephedra, Melatonin, DHEA y otro dos componente mas.

E prome confiscacion a bay na cuatro producto cu ta bisa cu pa cumpli cu ley, Croes mester presenta un certificado di benta publico di MR cu ta papia di e componentenan of e producto mes. Den e prome confiscacion a bay riba 4 producto cu tin otro componente.

Den e certificado publico cu ta mara na MR ta indica, segun Croes a menciona, cu ta e funcionario di Aduana esun cu ta pidi esey. Aworaki nan ta bay corte pa “algo cu a mi nunca tin version di remedi p’e, pasobra e productonan cu nan tin warda, ami nunca a bay den version di remedi. Mi ta keda para riba cu mi no ta bay bao ningun circunstancia y si mi tin mester di certificado publico mes ta pa esnan cu m’a caba di menciona, pa nada otro.”

El a sigura cu tin cuatro cargamento di dje ‘warda’ y esaki ta algo cu niun hende por tolera di niun empleado publico, esta nenga di duna servicio na un comerciante cu tin duna servicio na clientenan. “40% di mi clientenan ta hendenan desespera pa nan enfermedad cu ta cancer, bin busca ayudo cerca a mi.”

Di su parti, abogado Bryan Coffie a sigura cu nan a manda cartanan na e ministernan concerni y na e director di Aduana tambe pa purba di yega na un solucion sin cu ta caba den corte, “pero den caso aki e departamento of whatever cu mester tuma e decision, a keda para riba dje cu meneer Croes mester busca un stempel na IVA. Y esey ta algo cu meneer Croes a laga sa cu e no ta dispuesto pa haci, pasobra ley ta exigi pa bo bay inspector di remedi ora ta trata di un remedi cu ta empaketa, pero akinan tin hasta vitamina, un stap di su nieta y otro productonan cu ta pega aworaki,” el a finalisa.