(AP)—Presidente Ruso Vladimir Putin a reuni cu ex-presentado di Fox News, Tucker Carlson, na Kremlin pa un entrevista di dos ora, pushando su perspectiva riba e hustificacion pa e guera di casi 2 aña cu Ucrania, e prospectonan di discusionnan di paz, y otro asunto. Tambe el a papia tocante e detencion di Evan Gershkovich, un reportero Mericano pa The Wall Street Journal, ken tin carga di spionahe.
Aki ta sigui algun declaracionnan cu Putin a bisa y e contexto tras di nan.
Ken a cuminsa cu e guera
Putin a bisa: “Tabata nan cu a cuminsa e guera na 2014. Nos meta ta pa para e guera. Y nos no a cuminsa e guera aki na 2022. Esaki ta un intento pa caba cune.”
E declaracion aki ta referi na e violencia na Ucrania cu a ser causa pa expulsion di e presidente Viktor Yanukovych na 2014, entre protestanan anti-gobierno masal na Kyiv. Rusia a responde por medio di anexa e region Crimea di Ucrania ilegalmente, y pelea a surgi den e parti oost di e pais, unda separatistanan pro-Moscu a bisa cu nan tabata purba di proteha e poblacion cu ta papia Ruso.
Ora Putin a manda tropanan na Ucrania dia 4 di februari 2022, Ucrania y su aliadonan den west a describi esaki como un acto di agresion sin provocacion. Putin a bisa cu nan a forsa Moscu pa actua preventivamente pa stop Ucrania di uni cu NATO y preveni un movida ofensivo grandi pa Kyiv cu a intencion pa tuma e regionnan den oost back. Rusia no a provee ningun evidencia cu operacion asina tabata andante.
“Denazificando” Ucrania
Putin a bisa: “Nos no a logra nos metanan ainda, pasobra un di nan ta e denazificacion, cual ta nifica pa prohibi tur tipo di movemento neonazi.”
Propagandistanan Ruso continuamente a busca pa pinta e presidente Ucraniano, Volodymyr Zelenskyy, como un neonazi of un simpatisante di e movemento Nazi, aunke e ta Hudiu y a bisa cu tres omo grandi di dje a muri den e Holocaust. Putin a ofrece ningun prueba pa apoya su declaracionnan cu gruponan ultranacionalista y radical na Ucrania a influencia Zelenskyy y tin un bos decisivo den e formacion di e politica di e pais.
Fracasonan inicial di discusionnan di paz
Putin a bisa: “Ora nos a hala nos tropanan for di Kyiv, negociadonan Ucraniano inmediatamente a tira tur e acuerdonan di Istanbul afo y a prepara pa un confrontacion arma cu e ayudo di Merca y su satelitenan den Europa.”
Oficialnan Ruso y Ucraniano a negocia un trato di paz tentativo na Istanbul na maart di 2022, un luna despues di e comienso di e invasion, pero esaki a cay den otro. Mientras cu Rusia a pinta e retiro di su tropanan for di e areanan cerca di Kyiv como un señal di buena boluntad, e forsanan Kremlin claramente a ser forsa di retira debi na perdidanan grandi y problemanan logistico mientras nan tabata purbando di captura e capital Ucraniano.
Negociacionnan den futuro
Putin a bisa: “Nos no a rechasa negociacionnan.”
Mientras cu el a insisti cu Rusia ta habri pa negociacionnan, Kremlin a mantene un posicion di negociacion estricto, bisando cu Ucrania mester acepta e ganashinan cu Rusia a haci den e partinan oost y zuid di e pais. Ucrania, pa su parti, ta bisa cu negociacionnan no ta posibel te ora cu Rusia retira completamente for di areanan ocupa. Na september 2022, Moscu a anexa e regionnan di Donetsk, Lugansk, Zaporizhzhia y Kherson ilegalmente, pa bay cu su anexo di Crimea.
Carganan di spionahe contra Mericano Evan Gershkovich
Putin a bisa: “El a ser gara hustamente ora e tabata hayando informacion clasifica.”
Gershkovich, un reportero pa The Wall Street Journal, a ser deteni na maart 2023 riba carganan di spionahe y ta den prison te dia di awe, wardando su huicio. Gershkovich y e Journal a nenga e acusacionnan, y e gobierno Mericano ta bisa cu el a ser deteni inhustamente. Autoridadnan Ruso no a publica ningun di e evidencia cu Putin a cita pa apoya e carganan. Putin tambe a sugeri cu un intercambio di prisonero tabata posibel.
