Hoben, bo kier bira Agente di Wardacosta pa proteha bo pais? Bo kier yuda salba bida di hende y yuda intercepta botonan cu ta trece mercancia ilegal Aruba? Wardacosta ta informa hobennan entre 18 y 25 aña, cu tin e ambicion pa bira Agente di Wardacosta, pa inscribi nan mes pa e Estudio Basico pa bira Agente di Wardacosta (Basis Opleiding Kustwacht, BOK).
E estudio basico ta un programa di estudio cu un duracion di 1 aña cu vaknan practico y teoretico, incluso un training pa bira Agente Policial Extraordinario (Buitengewone Agent van de Politie, BAVPOL). Tanto hobennan masculino como femenino por inscribi pa e estudio di BOK.
E estudio ta start den augustus 2024 cu un periodo di introduccion, asina yama ‘SamenSterk’. E meta di e periodo ‘SamenSterk’ ta cu e aspirant durante e periodo aki, lo crece tanto fisicamente como mentalmente y ta cera conoci cu e organisacion di Wardacosta. Durante e estudio e aspirantnan ta ricibi habilidadnan basico, di entre otro EHBO (‘first aid’) y training cu arma. Tambe educacion noutico y vaknan di training basico di ekiponan di rescate, paga candela, legislacion di Wardacosta y manual di radio VHF, cualnan ta forma parti di e pakete di e estudio BOK. E condicionnan pa inscribi ta cu bo tin nacionalidad Hulandes, y cu bo ta inscribi na Aruba, Corsou, Sint Maarten of islanan BES y cu bo tin entre 18 y 25 aña di edad, na inicio di e curso. Tambe bo mester tin minimal un di e siguiente diplomanan: MAVO-4/ VMBO/VSBO-TKL/ L.T.S/ T-stroom/ EPB-door -stroom/ EPI of un diploma ekivalente na educacion secundario, cu bo tin un diploma di landamento, cu bo por lesa y skirbi Hulandes, tin un bon condicion fisico, cu bo no ta bisti bril of lens y cu bo no tin un ‘strafblad’.
Si bo ta interesa den e estudio, bo por bishita e website di Wardacosta via werkenbij.kustwacht.org Aki bo por sigui e link pa yega na e formulario di inscripcion. Inscripcion ta cera 1 di mei 2024.
