Algun habitante di Sero Colorado preocupa pa paso di trucknan cu ta causa daño

Algun habitante di area di Sero Colorado for di algun tempo caba ta bin hayando preocupacion debi na e construccion di hotel Secrets Baby Beach, segun nan mesun declaracion, truck cu material di construccion y ekiponan pisa ta causando molester na e habitantenan y ta dañando caminda.

Sin duna detaye di nan nomber pa no enfrenta cu problema of haya represalia, e dos persona aki a tuma contacto cu redactor di Bon Dia Aruba pa asina splica e situacion cu nan ta bibando na e momentonan aki.

Ta asina cu for di momento cu noticia di e construccion di e hotel na area di Baby Beach a bira conoci tabatin cierto desacuerdo entre algun habitantenan y e mesun compania doño di e proyecto pa esaki no bira realidad, sinembargo, e dos persona aki a conta cu esey no ta e caso aworaki, pa motibo cu nan ta di acuerdo cu e desaroyo cu ta tumando luga den area pero e problema specifico ta cu e trucknan cu ta hiba y trece materialnan di construccion ademas di ekiponan pisa den oranan di mainta y hasta den oranan di anochi marduga, ta causa molester na habitantenan y tambe na e camindanan loke a bin dañando full e asfalt di e luga y tambe e polisnan drumi.

Por a compronde cu e dos persona a acerca na e compania di e trucknan aki y a puntra un di e chauffeurnan dicon nan ta pasa den caminda aki memey di e casnan si nan tin un ruta estableci for di basta tempo caba precisamente pa e trucknan unda nan no tin cu atravesa e bisindario, nan a haya como contesta “e chauffeur a bisa nos cu gobierno ta paga y cu nan ta haci nan trabou, pero no ta gobierno ta bay paga e daño na e camindanan cu awor ta yen di buraconan, na final di dia ta nos tin cu paga cu nos belasting, bo mester wak marduga, nan sa ki ora polis ta bin akinan pa no pasa, bo ta scucha nan coriendo duro for di ariba, door cu e polis drumi ta plat, nan no ta brake, nan ta bula over di dje.”

Nan a informa cu nan a yega di papia den un reunion cu director di DOW Marlon Croes den pasado den cual nan a papia tocante diferente puntonan cu e habitantenan tabatin, “el a priminti cu e ta bay zorg pa tin otro caminda temporario pasobra den futuro nan mester di un caminda hopi mas luhoso y grandi pa yega na e hotel, e intencion semper tabata pa usa e caminda cu nan a crea, nan a kita tur e hubadanan y traha full un caminda di santo, pa tur trafico atravesa e caminda ey, dus a mi no ta compronde pakico nan no ta usa e caminda ey cu eigenlijk ta mas cortico, esey ta e problema.”

Redactor di Bon Dia Aruba a acerca e area di hotel y a mira un caminda cu segun habitantenan aki a sigura tabata destina pa e trucknan, un caminda den mondi cu for di Sero Colorado por aprecia cu a wordo rosa pero pa motibo cu no ta wordo usa, el a yena di yerba back.

Igualmente nan a comenta cu Asociacion di Habitantenan di Sero Colorado tin un afspraak cu e manager di e proyecto di hotel, den esaki, nan a aclaria cu no ta tur habitantenan ta miembro, unda cu tambe ta existi e grupo cu a entama un caso contra e construccion di e hotel, pero esey ta aparte di nan.

E asociacion di habitantenan aki ta existi for di mas di trinta aña caba, unda nan a dicidi di bin dilanti un biaha mas despues di keda keto pa varios aña, pa asina wak con nan ta soluciona e problema aki, manera nan a informa, nan no ta contra e desaroyo di e hotel sino cu e dañonan cu trucknan cu material di construccion y ekiponan pisa ta causando den e bisindario.

“Si bo ta informa e habitantenan di tur e movecion cu lo tin pa algun dia cu e trucknan den bisindario, bisando sorry for the molester, pero nos no a haya nada, ni un dia nan a bisa nos nada, DOW a traha e caminda ey mas cu dos aña pasa y nan no ta us’e”, el a señala.

Tambe, el a menciona cu e proyecto no ta mustra manera na comienso a wordo informa comunidad “esaki no ta mustra nada cu e plan cu nan a duna di conoce den prensa unda nan tambe a bay Republica Dominicana, nan no ta duna informacion pa wak con e ta bay bira”.

Pa finalisa, nan tambe a expresa nan preocupacion cu e beach, nan ta sinti cu ora hotel lo keda cla, nan no lo por disfruta di e beach como habitantenan local di e area, cu nan no lo tin acceso na e beach mas, “nos no ta bay bin na e beach mas pasobra e lo ta mucho yen caba y e beach ta di nos”, nan a bisa.

Bon Dia Aruba ta bay tuma contacto cu instancianan envolvi pa asina por informa comunidad debidamente tocante e problema aki.

Riba potretnan ta ilustra e polisnan drumi desgasta; e daño cu trucknan ta causando riba e caminda; e ruta cu e trucknan mester a core cu ta yen di yerba door di falta di uso y avancenan di e construccion di e hotel.