Diamars atardi un biaha mas dump tabata na candela, un problema cu ta keda un peliger grandi pa salud di e habitantenan di e area como tambe pa medio ambiente. Segun Minister di Transporte, Integridad, Naturalesa y Asuntonan di Adulto Mayor, Ursell Arends, dump di Parkietenbos ta bay cera dia 31 di december.

“Den 1 aña nos a bin ta traha riba un solucion structural pa un problema cu a bin ta causa peliger na nos medio ambiente y pa e salud di nos habitantenan ya pa 70 aña caba, pero pa 31 di december 2022 nos ta bay logr’e!” Esey ta comentario di Minister Arends cu ta sigura cu dump na Parkietenbos ta bay cera dia 31 di december.

Un experto den e tema aki a splica na Bon Dia Aruba cu cera dump no lo yuda pa evita candela, pasobra si no bora pos pa laga e gas cu methano sali for di suela, e candelanan no lo stop. Ademas el a agrega cu mester usa flare of un generator pa produci electricidad.

Den luna di augustus, reportero di Bon Dia Aruba a bishita e dump na Parkietenbos pa combersa cu e trahadonan di e dump cu ta traha y haci nan maximo esfuerso pa crea menos molester pa e habitantenan di e area.

“Ta nos ta haya zundra di hendenan den bario ora tin candela”, nan a indica. Nan a splica tambe cu nan ta traha sin mascara ni ningun tipo di proteccion. “No ta na nos interes pa e dump ta na candela. No tin ningun protocol di proteccion pa salud pa e bario ni pa nos”, nan a agrega.

Den luna di juli Minister Arends a presenta un proceso di cambio cu ta bay tuma luga pa maneho di desperdicio. Durante un conferencia di prensa el a sigura cu esaki ta cu e obhetivo di yega na un economia circular.

“Den un economia circular, desperdicio no ta existi, di manera cu nos ta anda cu desperdicio pa un manera cu ta recupera e material y e balor”, Arends a bisa.

Loke nan ta trahando riba dje, segun Arends a splica tambe durante e conferencia aki, ta e prome paso pa restructura e maneho di desperdicio, loke ta encera reorganisa unda e sushi ta bay y con e ta wordo procesa. “Pa nos logra cera e dump na Parkietenbos, nos mester cuminsa na stop e fluho di desperdicio cu ta yega na dump”, el a indica.

Arends a introduci e plataforma ‘Trash2Cash’ pa e motibo ey. E plataforma aki tin como obhetivo simbolisa cu desperdicio desperdicio tin un balor economico y tambe pa comunidad cuminsa cambia nan manera di pensa riba kico desperdicio ta nifica.

Den un edicion di Bon Dia Aruba den luna di april, a resalta un e-mail cu Sra. Anouk Balentina a manda pa entre otro Gobierno Hulandes, pa medio di e Secretario di Estado Alexandra van Huffelen, pa Ministernan na Aruba, entre otro Prome Minister Evelyn Wever Croes, Minister Ursell Arends, Directornan di entidadnan publico encarga cu maneho di sushi y medio ambiente.

Secretario di Estado a contesta e e-mail aki comentando cu el a spanta pa e condicionnan rond di Parkietenbos y cu el a papia cu Prome Minister Evelyn Wever Croes riba dje e topico aki.

Secretario di Estado Van Huffelen a gradici pa e e-mail y ta expresa aprecio pa e forma con Sra. Balentina ta bringando pa e derechonan fundamental cu ta keda afecta pa molester di dump, y cu e mes a spanta pa e condicionnan, pa cual motibo a discuti e situacion cu Prome Minister Evelyn Wever Croes.

“Maneha y procesa desperdicio na un forma responsabel sinembargo ta responsabilidad di pais autonomo, Aruba. Como tal ta Gobierno di Aruba pa reacciona riba e grito di desespero. Sinembargo, den mi combersacionnan cu Gobernantenan di Aruba lo mi sigui trece e punto aki dilanti,” Van Huffelen a priminti. “Un ambiente di biba saludabel ta di balor pa tur hende den Reino y mi ta dispuesto pa duna mi banda.”

E mandatario Hulandes a conseha Balentina pa sigui presenta su preocupacion na Gobierno di Aruba y cana tur e camindanan legal posibel. Banda di esey, el a urgi Balentina pa keda tene Representacion di Hulanda na altura di tur e desaroyonan rond di Parkietenbos. “Mi ta desea bo hopi forsa den e proceso pa yega na mehoracion y ta spera di un accion rapido di parti di Gobierno di Aruba.”

Individualmente e ciere di dump ta trece cune diferente pregunta: con lo haci cu e montaña di sushi cu tin aworaki? Unda e personanan cu ta haci uso di dump regularmente lo mester benta nan sushi afo despues cu esaki cera? Con e proceso lo ta pa cera dump y con leu esaki ta?

Bon Dia Aruba a acerca Minister Arends cu e preguntanan, pero no a logra ricibi un respuesta prome cu e ciere di e edicion.