Alumno ciego ta logra su diploma A di landamento

FAVI ta sumamente orguyoso di tur su clientenan cu a of cu ta bay pasa nan diploma di landamento Escolar e siman aki.
Awe mainta un di nos clientenan ciego, Casiene Tromp, a logra su Diploma A cu exito. Esaki a tuma luga conhuntamente cu tur otro alumno cu no tin problema di bista na piscina olimpico Roly Bislik.

Un di FAVI su metanan ta pa duna guia y sosten na e deseo di cada cliente, pa e por logra su metanan segun su capacidad. Ta p’esey mes e maestranan di FAVI ta keda enfatisa esaki na cada scol unda cu tin un mucha cu limitacion di bista. Casiene ta bishita Colegio Sta.Teresita na San Nicolas y nos ta sumamente contento cu Colegio Santa Teresita y Arubaanse Zwembond a mira e potencial y capacidad di Casiene como persona ciego.

E maestro di FAVI a cuminsa di un aña anterior pa prepara, busca informacion y planifica henter e proceso di guia.

Una bes cu e lesnan a cuminsa, e maestro di FAVI, e assistent di klas di Casiene y e maestro di zwemmenbond, hunto a drenta awa cu e alumno pa siñ’e tur e tecnica di landamento.

FAVI kier gradici Arubaanse Zwembond (landamento Escolar) pa nan cooperacion y dedicacion cu nan ta duna na muchanan cu limitacion di bista, specialmente juffrouw Joyce.

Na tur mucha cu lo bay pasa nan examen e siman aki, hopi exito!