Minister Xiomara Ruiz- Maduro (MEP) ta haya cu den cuadro di introduccion di e pakete di impuesto di crisisheffing a wordo crea un panico al estilo ‘Armageddon’. “Cu dia 1 mundo ta stop di lora mes na Aruba”, e di. A wordo crea un ambiente cu tur cos ta bira caro y impagabel, siendo cu e no ta asina, segun e mandatario.

E ta haya cu introduccion di e crisisheffing a wordo saca fei di contexto. No ta cuestion cu a bin cu un pakete adicional di 6% di impuesto riba locual comunidad ta bin pagado via BBO y BAZV, sino cu e aumento di e impuestonan aki plus e BAVP a subi di 3,5% pa 6%, kiermen el a subi cu 2.5% di loke tabatin caba. El a compara esaki cu e introduccion di un 2.5% cu gobierno anterior a introduci via BAZV y cu segun e mandatario, ‘e mundo no a caba’. E total di tur e belasting aki ta 6% entrante 1 di juli.

Aumento di prijsnan
E ta consciente cu ora gobierno ta bin cu cualkier sorto di impuesto e prijsnan ta subi, pero despues nan ta normalisa of tuma su forma cu e hendenan ta custumbra cu ne.

E ta lamenta cu tin forsa cu ta crea un expectativa di tension na bispo di 1 di juli. E ta haya cu e ambiente di tension aki no ta necesario. Ademas el a menciona cu e introduccion di e crisisheffing cu lo drenta na vigor entrante luna di juli ta uno temporal. El a considera e crisisheffing como un ‘brug’ cu nos mester traspasa un rato.

Gobierno ta trahando riba un reforma fiscal. Segun e minister, nan ta trahando cu experto(nan) local, pero tambe internacional di IMF (Fondo Monetario Internacional) cu pronto lo bini, pa bin cu un sistema fiscal mas husto y simpel.

E reforma aki lo mester simplifica nos sistema fiscal, cual awo ta hopi complica. Nan mester bin cu un forma mas simpel pa e comunidad, comerciantenan, pero tambe pa e departamento di impuesto. E reforma aki lo facilita pa e control por ta mas directo y eficiente pa tur hende por cumpli cu nan compromiso fiscal of pago di impuesto.

E mandatario a pidi un poco di pasenshi, ya cu nan ta atendiendo e asunto aki cu e seriedad cu e merece. E aumento di impuesto aki ta algo impopular cu niun hende kier ya cu e ta bay haci dolor pero ‘un tiki so’. E mandatario a compara e dolor cu pueblo ta bay sinti cu ‘priki’, e caricatura uza durante campaña di vacunacion.

Exoneracion
E mandatario Ruiz-Maduro a informa cu despues cu nan a reuni cu asociacion di bankero y tambe companianan di seguro, gobierno a bin cu un decreto ministerial cu a keda firma ayera pa bin cu algun exoneracion riba pago di impuesto riba cierto servicio.

Pa papia riba e topico aki e mandatario tabata compaña pa directora di departamento di impuesto, Luenna Gomez-Pieters, y tambe expertonan di departamento Economico.

Asociacion di banco y companianan di seguro tabatin un reunion mas tecnico hunto cu departamento di impuesto, unda a wordo acorda cu tin cierto di e transaccionnan den cual entrada cu e banco ta genera ta wordo exonera di paga belasting di BBO, BAZV y BAVP. Den e decreto ta aparece e parti cu mester exonera, y cu e ta spera cu banco y companianan di seguro lo informa debidamente di nan na comunidad. Segun e mandatario, tanto e sector bancario como esun di seguro ta informa di tur e exoneracion cu e decreto ministerial ta contene.

Nan a dicidi di bin cu e cambio aki –segun minister Ruiz-Maduro- ya cu pais Aruba ta bayendo den un transicion pa haci menos uzo di placa cash. Pa evita cu den e actual situacion e hendenan ta bay uza mas placa cash, nan a bin cu exoneracion cu a keda aproba dos dia prome cu crisisheffing a drenta na vigor.

Gobierno a bin di acuerdo cu asociacion di banco (ABA) cu locual ta bira e entrada cu e banco ta gana pa ehempel pa medio di online y uzo di tarheta di pago di debito y credito, transaccion di divisa, etc… esakinan ta wordo exonera di paga gobierno e BBO. Tambe online banking ta keda exonera, si e banco no ta cobrando pa e servicio aki.

Pero si e banco ta cobra pa e servicio aki y otro servicionan cu banconan lo informa nos comunidad di nan, akinan si nan tin cu paga gobierno ariba entrada cu ta genera pa e parti akinan. Cada banco tin cu bisa nan clientenan, kico ta bay bira nan tarifa. Kiermen kico nan ta bay cobra y kico nan no ta bay cobra.

E mandatario a bisa cla: “Niun transaction tax a wordo introduci.” Cu esaki e minister kier bisa cu no ta un belasting ta wordo cobra riba cada transaccion cu ta wordo haci na banco. Sino cu e ley mas tanto ta ariba e entrada cu e banco ta gana a base di e gastonan cu e ta trece pa su clientenan.

Pago di seguro
Pa loke tin di haber cu e parti di pago di seguro a bin cu cambio tecnico, unda un caminda so ta wordo cobra belasting. Di e forma aki gobierno kier evita e cadena di aumento debi na pagamento di impuesto. Esaki pa evita cu tin hendenan cu lo uza e aumento aki como excuus cu pa motibo di aumento di pago di seguro, nan ta keda sin paga nan seguro di auto.

E mandatario a bisa cu e companianan di seguro sa caba di e cambionan introduci pa medio di e decreto ministerial aki. Tanto entidadnan bancario como di seguro cu a participa den e reunion tecnico cu departamento di impuesto, ta na haltura di e conclusion, e di. E conclusion aki a yega gobierno di cual nan a bay di acuerdo pa medio di un decreto ministerial.

Tambe cada compania di seguro lo indica nan clientenan riba e gastonan extra cu nan ta bay tin. El a declara cu e companianan di seguronan ta bay paga riba entradanan cu nan ta genera pa cu e servicionan cu nan ta brinda. “Esun cu ta haya exoneracion no tin pakico subi e cobransa pa cu esaki”, e di.