Turtuga di 75 aña asesina na rif di Rodgers Beach

Aunke pa ley cierto especienan di nos fauna manera turtuga ta proteha, tin hende cu ta sigui jaag turtuga, manera polis maritimo a mustra ayera mainta.

T’asina cu ayera mainta nos a ricibi un comunicado di polis unda ta splica cu polis maritimo a bin topa hunto cu personal di Departamento di Natura y Medio Ambiente (DNM) durante un investigacion pa 12 or y mey restonan di turtuga.

Polis a informa cu hunto cu e boto di polis maritimo BP-2 e personal a bay pa midi na diferente luga e stroom di lama y e cantidad di oxígeno bou awa. Polis a presenta na e sitio mirando cu un melding a drenta unda nan ta bisa cu tabatin diferente casca di turtuga.

Ora a yega ariba e rif enberdad a bin haya 4 casca di turtuga y tambe cabesnan di turtuga. E turtuganan aki ta protegi y lastimamente ta bin encontra e restonan aki. E restonan di turtuga a wordo tuma den beslag pa personal di DNM. E turtuga aki ta un especie cu ta protegi pa e tratado internacional di CITES y alabes pa articulo 6 inciso 1 Natuur beschermingverordening Aruba. Mester recorda cu ta castigabel pa ley pa mata e especie protegi aki y cu tin multanan pisa pa cu esaki.

Edith van der Wal, presidente di Fundacion TurtugAruba a reacciona na Bon Dia bisando cu esaki a tuma luga mirando cu e area ey tras ta scondi, pues no tin mucho control y hende sa cu esaki ta e caso, pues nan ta probecha di haci e actonan ilegal aki ey tras.

Loke ta mas lamentabel ainda segun sra. van der Wal ta cu un di e turtuganan cu a sufri e crimen aki tabata un turtuga basta grandi, cual ta indica cu e lo a tin mas o menos 75 aña bibando. “E ta hopi lamentabel. E tabata bay pone webo pronto.”

Pa preveni esaki den futuro e fundacion ta keto bay sigui conscientisa na scolnan cu esaki ta prohibi, pero mas aleu cu hende no por haci y deshaci cu naturalesa. “Bo ta wak ya caba cu e peso riba naturalesa ta hopi pisa.” Sra. van der Wal a indica cu turtuga ta un di e instrumentonan cu naturalesa tin pa regula su mes, pues turtuga, specialmente e Green Turtle tin e tarea pa come e yerba bou awa ora esaki ta crece dimas. “Anos mes no ta bay haci e trabou aki berdad? E bestianan tin nan funcion den e ecosistema, pues si nos ta tuma nan pa come of mi no sa kico, esaki ta kita e balansa di e sistema ecologico.”

Esaki ta un manera con por wak cu e balansa entre naturalesa y hende no ta na ordo, segun sra. van der Wal. Sinembargo, e presidente di e fundacion a expresa cu lo unico positivo di loke a pasa aki ta cu danki na e accion di polis y DNM ta posibel cu menos hende lo sigui jaag turtuga. “Esaki ta un cambio positivo pasobra e instancianan ta tumando accion.”

You May Also Like

23 sep DT WEB (1).JPG

WEB Aruba ta introduci servicio di SMS WEBcheker

‘Desde awe comunidad di Aruba por check su saldo di cuenta di awa na ...

afiliacion fondo di turismo new.JPG

Hopi compania di sector turismo no ta afilia na fondo di pensioen di PFTSA

Segun directora di Fondo di Pensioen di Sector Turismo di Aruba (PFTSA), sra. Sanaa ...

ferry 2.jpg

Aruba tampoco ta cla awor pa operacion di un ferry

Director di departamento Maritimo (Directie Scheepvaart), Sr. Carlyle de Coteau ta declara na Bon ...

Asunto di refugiado ‘no ta responsabilidad di Hulanda’

Mientras no por duna claridad riba con a calcula e suma di 6,8 miyon ...

Challenge Aruba (NW) (6).jpg

Resultado di e prome Challenge Aruba

Ayera a tuma luga e competencia di Challenge Aruba 2016. Esaki ta prome biaha ...

kpa.jpg

Te cu aworaki tin 11 morto den trafico pa aña 2015

E prome accidente fatal di e aña tabata prome di februari y te cu ...