America Latino ta na alerta pa e plaga ocasiona pa e sangura ‘Aedes Aegypti’ cu ta encarga di transmiti e malesa di Dengue na e ser humano. Den actualisacion di e casonan di augustus, OPS a conta mas di dos miyon di caso, di cual 723 a conclui cu fayecimento di e pashentnan.

Brasil, Colombia, Guatemala, Honduras y Nicaragua ta algun di e paisnan mas afecta pa e extension di e virus aki cu ta contagia pa via di e sangura, tambe transmisor di e malesanan Zika y Chikungunya.

“Ta un herment cu ta utilisa na e organisacion pa avisa e estadonan miembro den e region di America di cualkier enfermedad cu ta representa un menasa pa salud publico”, Dokter Miguel Aragón, Consultor di Malesanan Transmisibel di OPS, a splica.

Di e mas di dos miyon di caso, su mayoria ta pertenece na e tipo di Dengue comun, cu di forma habitual ta manifesta cu keintura hopi halto y tin biaha, hasta ta confundi cu griep. Sinembargo, e sintomanan por bira pio, te hasta yega morto si ta trata di e Dengue hemorragico.

Di henter America Latino, e malesa aki specialmente a afecta e paisnan Centro Americano, debi cu e region a experimenta un periodo di mas calor, aunke e number di caso lo aumenta na e Cono Sur di Sur America cu e yegada di e primavera y verano.

Brasil ta e pais cu a notifica un number mayor di personanan afecta pa e virus, cu un total di 1.345.994 persona, mientras cu Guatemala ta e estado cu un porcentahe di morto mayor, ya cu 0,32% di e personanan diagnostica a fayece; paisnan manera Honduras ta supera caba e centenar di fayecimento pa Dengue hemorragico.

 

LEAVE A REPLY

Please enter your comment!
Please enter your name here