Ayera funcionarionan publico di Argentina a para nan labor di trabou pa reclama reahustacion di nan salario debi na inflacion halto di e pais y re incorporacion di e personanan kita den ultimo lunanan.

Tabatin mobilisacion na henter e pais, ademas di e marcha principal na Buenos Aires, cu tabata bou e convocatorio di Asociacion di Trahadonan di Estado (ATE) y e Central di Trahadonan di Argentina Autonoma (CTA-A), cual a yama un welga nacional na un momento den cual e crisis economico cu e pais ta biba, a bira esun pio desde april 2018.

Un dia despues di e eleccionnan primario dia 11 di augustus pasa, e bolsa a cay y e dollar a cuminsa su subida; un cos cu e mesun gobierno a reconoce cu lo bay ta refleha den e dato di inflacion di augustus, cu lo anuncia mañan.

“E medida ta pa exigi e re incorporacion di tur e trahadonan cu a ser kita, reapertura di salario, reestablecemento di tur programa cu a duna den baha, rechaso na e acuerdo entre Gobierno y Union Personal Civil di Nacion (UPCN) pa e stabilidad”, ATE a bisa den un comunicado.

Na Argentina, cada sector tin sindicatonan cu ta negocia cu entidadnan publico e aumento di salario cu loke ta trata inflacion, yamada tripartite.

Hopi di e negociacionnan ey, den añanan ultimo, a keda desactualisa ora e inflacion a crece ariba di e aumento acorda.

Varios sector di e sociedad, como Confederacion General di Trabou (CGT), un di e sindicato mayor di e pais y Iglesia Catolico, ta exigi pa Gobierno decreta emergencia di alimentacion pa via di e crisis.

 

 

LEAVE A REPLY

Please enter your comment!
Please enter your name here