Aña parlamentario a keda inaugura ayera, y naturalmente nos tabata pendiente, mescos hopi ciudadano, pa loke tabata e anuncionan cu nos lo a haya di tende den discurso di Gobernador. Pa bisa berdad, nos a keda un poco decepciona cu e contenido. Pero laga nos clarifica di antemano cu esey no tin nada di haci cu nos Gobernador, cu den su papel di hefe di gobierno di Aruba ta pronuncia un discurso na nomber di e actual gobierno, y no un texto cu e mes ta prepara. Na poco ocasion a yega di sucede cu den e discurso tabatin elemento cu tabata bin di e otro banda, esta e papel di Gobernador como representante di Rey.

Na 2014 riba insistencia di gobierno di Hulanda a pone un parti cu tabata trata e situacion financiero precario di gobierno di Aruba, loke a causa bastante malestar cerca gobierno di e tempo ey y e parlamentarionan di e partido di gobierno a aparece den sala bisti di luto, pa expresa nan desacuerdo. Salvo un incidente asina, e discurso ta loke e gabinete di e momento ta propone pa haci den e siguiente aña parlamentario.

Pa bolbe na nos decepcion: nos a spera di tende un poco mas claridad riba cierto tema importante y actual, manera e situacion financiero y e retonan nos dilanti, cu e obhetivonan programa pa atende e asunto aki. Por ehemplo, riba un tema asina importante manera e reforma fiscal nos no a tuma nota di un splicacion al caso di kico por spera desde e aña entrante. Nos a tende na otro momento di e posible introduccion di un ‘sugar tax’ na januari 2020, algo cu sigur lo tabata di menciona na e ocasion aki. Di e demas temanan relaciona cu e reforma fiscal: ni un silaba. Esaki ta trece duda cerca nos; y di dos cos, uno ta corecto: of gobierno no kier revela nada ainda di kico ta bay pasa riba e tereno aki, loke ta grave si tuma na cuenta e cantidad di biaha cu a laga Gobernador expresa e palabra ‘transparencia’ o ‘transparente’; of e caso ta cu no tin nada di conta ainda, ya cu no tin un decision kico ta bay haci. Loke tambe lo ta grave, pasobra esey ta implica cu riba un di e temanan central den e maneho actual no por trece claridad. Y nos ta inclina pa scoge e ultimo opcion aki.

Ademas di esey, no a menciona nada tampoco di e otro aspectonan di suma importancia na e momento aki, relaciona cu finanzas publico, manera e posibilidadnan di indexering di salario si of no. Mientras awe mainta e prome welga relaciona cu indexering ta tuma lugar, gobierno no ta tuma e oportunidad pa atende e tema aki. No comprende nos malo, nos no ta bisa cu gobierno mester haci promesa djis pasobra tin exigencia. Si di berdad no tin espacio pa mehora salario, y segun nos opinion no tin, anto ayera tabata e momento clave pa laga henter comunidad, di cual e gran mayoria no ta empleado publico, sa cu di berdad no tin placa pa e proyecto aki. Di otro banda, aki nos por mira con caro e erornan cometi casi dos aña pasa ta: na lugar di mantene un espacio financiero den gasto di personal, a opta pa yena e aparato cu hende di e partidonan den coalicion, di manera cu e gastonan aki a keda mes inmanehable cu nan tabata bao di e gobierno anterior. Y cu esaki a duna esnan cu ta exigi indexering actualmente un argumento, den estilo di “si bo tin pa pone mas hende na trabao, anto bo tin pa nos tambe.”

Den e demas temanan trata den e discurso tabata obvio cu no tabatin tanto cos nobo pa menciona, y a cay den ripiticion di asunto cu ya tabata canando caba. Nos a sinti falta por ehemplo di un concretisacion di accion cu lo tuma pa logra e metanan economico, incluyendo e sectornan primordial y prioritario cu pa algun tempo ta menciona den cada momento cu tin pa propaga esaki, sin cu ta mira un avance den ‘habri paso’ pa sector priva cu medida pa facilita haci negoshi. Fuera di e mencion di e proyecto di ‘e-government’ cu talvez, nada sigur, por ta un beneficio pa comercio y industria, nos no a tende ni lesa nada cu ta bay den direccion di haci bida mas facil pa sector empresarial. Y esaki no ta un tema cu mester atende pa e comerciantenan ‘stop di maha’ pero ta sumamente importante pa gobierno mes: mas actividad economico ta trece mas placa den caha di gobierno, sin cu mester tuma extra medida cu ta desanima sector priva y ta desanima e consumidor en general. Y ademas, loke sigur no a anuncia, y cu segun nos tampoco ta e obhetivo, ta unda porfin ta bay corta gasto…

Remarcable tabata finalmente cu casi no a haci mencion di e proyecto mas candente di e momento aki: e plannan pa atende e problema di desperdicio… Por ta cu nan no por a yega na un acuerdo den e coalicion…? En todo caso, tanto novedad nos no por a scucha. Nos lo mester warda pa presupuesto pa sa algo mas di kico ta bay sucede otro aña?

 

LEAVE A REPLY

Please enter your comment!
Please enter your name here