Durante diferente decada nos por a wak con poco poco San Nicolas tawata bayendo atras economicamente mientras cu nos por a wak e area di Oranjestad y Palm Beach crece economicamente.

Ainda hopi di nos por corda con famianan tawata bay Coruba (actual BSL) pa haci compras, o bay Janchi Jewelers den caya principal di San Nicolas pa cumpra joyas o laga drecha joyas, o e barberonan cu tawata situa den e caya di Las Vegas Bar bay abou. Nos por corda Kong Ming Supermarket (actual Macro) con riba diasabra e luga tawata yena completamente cu cliente. Actualmente e luganan aki no ta existi mas. Alabes nos por a wak con scolnan a cera den e area di San Nicolas paso no tin suficiente alumno mientras cu otro scolnan a fuseer hunto pa asina por tin ainda suficiente alumno.

E epoca aki di decadencia ta yegando su final. Cu e binimento di Secrets Baby Beach nos lo por wak un San Nicolas cu lo sa di florece bek y asina forma un parti crucial den Aruba su economia.

Loke ta trata e refineria, desde añanan ’50 hopi proceso a wordo automatisa y mester menos forsa laboral pa traha. Cu e reapertura di e refineria na aña ’89 e no a duna San Nicolas e boost economico cu tawata mester di dje.

Y asina nos por wak cu poco poco, hopi habitante specialmente jong a cuminsa bandona San Nicolas pa asina establece nan mes den area di Noord/ Paradera. Esaki ta visibel tambe den e cayanan di San Nicolas.

Secrets Baby Beach cu su 600 camber lo ta bon pa minimo 1800 cupo di trabou. Awo cu e ta drenta den su fase di construccion, esaki lo atrae trahadonan pa e area. E trahadonan aki mester por come y bebe. Esaki sigur lo atrae tambe luganan di cuminda y luganan cu lo bende refreshment. Actualmente den e area di Colony nos no conoce un supermarket. E unico cu ta estableci den e area aki ta Lago Heights Food Center.

Actualmente Citgo ta cera y honestamente bisa, loke ta refineria a conoce su epoca cu a pasa. Secrets Baby Beach lo sa di bay genera entrada pa gobierno cu lo por compensa e perdida di un refineria.

Famianan cu a lanta na San Nicolas o yiunan cu a bay establece otro parti di Aruba lo sa di bin bek San Nicolas pa traha. Secrets Baby Beach lo sa di atrae diferente tipo di negoshi o actividad recreativo. Y esaki nos ta wak tambe den e proyecto di embeyecemento di Baby Beach area. Finalisando mi mester bisa e pueblo di San Nicolas pabien, paso loke e proyecto aki lo trece cune ta uno di un magnitud enorme pa un area cu pa decadanan a conoce unicamente decadencia. Awo San Nicolas lo conoce un epoca nobo y un desaroyo economico cu nos por ta orguyoso riba dje.

 

LEAVE A REPLY

Please enter your comment!
Please enter your name here