Segun Jennifer Arends-Reyes dia 20 di november ta dia internacional di derechonan di mucha y e aña aki ta cumpliendo 30 aña cu e tratado internacional aki ta existi. E ta un di e tratadonan internacional cu dia 6 di februari 1995, reino Hulandes a ratifica y cu constantemente mester keda un liña cora den tur gobernacion y ministerio.

Durante transcurso di añanan tin hopi mas campaña di conscientisacion, instancianan cu a ser funda pa cu e tema di derechonan di mucha y esey a contribui na diferente cambio, cambio den leynan, maneho y mehoransa na beneficio di tur mucha cu ta biba na Aruba pero ainda mester bisa cu falta hopi mas atencion pa locual ta e consecuencianan di decisionnan di gobierno ariba nos muchanan. Por ehempel na momento cu costo di bida incluyendo transporte subi drasticamente, e ta bay tin su consecuencianan ariba nos muchanan y e presion pa mayornan. Despues di 2 aña Aruba mester a conoce entre otro scol gratis pa tur mucha, schoolgeld lo mester a pasa pa pasado, airco pa tur nobenti pico scol na Aruba, cuminda pa tur mucha na scol, un staatscrèche, lo mester warda menos pa cuido di salud, lo duna amnestia y abusadornan di grandi of chikito no lo sali liber mas etc. Esakinan ta apenas algun promesa di campaña cu te ainda Aruba ta wardando riba dje.

A resulta cu awendia muchanan tin preocupacion cu nunca si lo tin cuminda riba mesa of no, of si su mayornan lo keda cu trabou, si tin placa pa gasolin pa hiba nan practica deporte, si a resta placa despues di paga awa of coriente pa cumpra cuminda of si nan tin cu warda 3-4 ora prome cu wordo yuda na dokter of hospital. Aruba ta pasando den momentonan dificil caminda cu tur decision di gobierno tin efecto y presion ariba nos famianan na Aruba. Cuido di salud, educacion y proteccion ta importante pa nos por brinda nos muchanan na Aruba y ki nan gobierno tin un papel importante pa cumpli cune na un manera efectivo cu por ser midi, pa por wak e avancenan den e inversionnan di fondonan publico y ta netamente esaki ta un di e criticanan di por ehempel e Sociaal Crisis plan cu e gobierno di Mep-Por-Red a bin cune. Un fondo di 18 miyon pa aña pa e Sociaal Crisis plan cu antes tawata primordialmente den presupuestonan di Ministerionan y cu e fondonan tawata yega cu hopi mas facilidad na e instancianan, awor e fundacionnan ta lucha pa yega na fondonan pa nan proyectonan. Aruba constantemente mester keda traha riba temanan cu tambe ta pasa cu hopi frecuencia ariba nos isla y tin data existente riba dje di instancianan local y un di e temanan aki ta violencia contra mucha. Campañanan fuerte mester purba mitiga e fenomeno aki den nos comunidad cu ta violencia na cas. Tin diferente forma di violencia, fisico, verbal, sexual y emocional ta pasando cu mas di un biyon mucha rond di mundo sin conta negligencia cu tambe ta un tipo di maltrato y cerca nos na Aruba e cifra nan ta halto, caminda 1 di cada 15 mucha ta experiencia un sorto di violencia, e impacto di e violencia aki contra nos muchanan ta laga un marca grandi den nos adultonan di mañan, mescos cu e tema di e aña aki, ‘children today, our keepers tomorrow.’ Sin conta e era cu nos ta bibando aden caminda hopi mucha ta experiencia bullying cibernetico of un of otro tipo di discriminacion. E ta trece cune insiguridad cerca nos muchanan cu ta trece reto cune pa nan desaroyo. E trabou colectivo pa lanta un mucha sano den nos comunidad ta continuo y ta algo cu esunnan cu ta na mando di un pais tin cu percura pa cumpli cu nan parti por ehempel pa tin trabou y pago husto, accesibilidad pa cuminda nutritivo, trankilidad, ayudo rapido, cuido structura pa grandi y chikito pa nos pais por progresa caminda cu e ultimo dos añanan Aruba a faya basta riba e puntonan aki y tawata tin hopi insiguridad pa famianan sra. Arends-Reyes ta termina bisando.

 

LEAVE A REPLY

Please enter your comment!
Please enter your name here