Andrew Rasmijn: ‘Banco Central ta habri pa traha cu Bitcoin’


Mirando desaroyonan recien cu algun banconan no ta tumando placa cash mas pa por recarga tarheta di credito, Bon Dia a acerca un persona local cu tin conocemento di tecnologia tras di Bitcoin, esta e Blockchain y Bitcoin mes.

Nos a mira den e reaccionnan riba noticia recien personanan cu tabata expresa nan malcontento cu e banconan y e tarifanan halto cu cliente mester paga pa por tin un tarheta di credito por ehempel. Tin personanan cu pa e rason aki ta mirando na alternativanan pa sirbi nan interesnan financiero. Andrew Rasmijn, kende ta un hoben di 20 aña, ta conta nos con el a haya interes den Bitcoin.

Sr. Rasmijn, kende a haal su propodeuse na Financiel Economische Faculteit (FEF) na Universidad di Aruba, ta conta cu originalmente el a haya interes pa inverti den e mercado di accion. Pa por tin e suficiente conocemento pa haci esaki, el a sigui e lesnan di Timothy Sykes, un persona famoso cu ta duna les den stock marketing.

M’a cuminsa ful den e stock marketing, pero e tempo ey Donald Trump tabata drentando oficina di presidente di Merca. Esaki a haci cu e mercado di stocks a bira hopi debil, mirando cu hende tabata preocupa cu Donald Trump lo cuminsa un guera nuclear of algo otro. Pa via di e panico aki e mercado a keda stanca of a keda baha.”

Un otro factor cu a conduci na un situacion no favorabel pa sr. Rasmijn por inverti den e stock market tabata cu e no tabata liber pa drenta tur actividad di e stock market pasobra e no tin 21 aña di edad. Despues di esaki sr. Rasmijn a busca alternativa riba internet y el a haya sa di Bitcoin.

Inversion den Bitcoin
El a impresiona mi cu Bitcoin tabata completamente maneha pa computernan den un network, sin intervencion humano. No tin un compania cu bo por bay fisicamente of instituto cu ta regula esaki.”

Asina sr. Rasmijn a inverti su placa destina originalmente pa e stock market en bes den Bitcoin. El a cumpra su prome Bitcoin ora esaki tabatin prijs di 700 dollar. Actualmente nos por mira cu 1 Bitcoin tin e balor di 5600 dollar. Tin hopi critica riba e echo cu e prijs di Bitcoin ta fluctua hopi y cu no tin ningun instancia cu ta regula e mercado pa Bitcoin. Pero segun sr. Rasmijn e fluctuacion frecuente aki ta hustamente loke a atrae su persona pa inverti den Bitcoin, pasobra ‘pa un trader mane ami ora bo por reconoce bon ki ora e lo baha y ki ora e lo subi, bo por traha hopi placa cu ne’. Sinembargo sr. Rasmijn no ta desmenti cu fluctuacion den prijs di Bitcoin no ta na fabor di esnan cu ta cumpra esaki.

Pero tambe e ta expresa cu mester wak un inversion den Bitcoin mas na largo plaso, pues ‘bo no por spera cu den 1 dia bo lo por bira rico’. Bitcoin posibelmente por ta un bon inversion mirando cu tin un cantidad limita programa den Bitcoin, cual ta haci cu practicamente e prijs lo sigui subi asina mas hende haya interes den dje. “E tin scarsedad integra den e programa. E cantidad total di Bitcoin cu lo por existi ta yega te 21 miyon y no mas”.

Sr. Rasmijn ta adverti cu e no ta un consehero financiero, pero den su opinion un inversion den Bitcoin ta un bon inversion mirando cu tin un probabilidad halto cu den futuro e prijs di Bitcoin lo sigui subi. Alabes e ta adverti cu si un persona tin interes den inverti den Bitcoin mester tene cuidou pa solamente inverti placa cu e persona no tin pa otro necesidad.

Mashinnan di Bitcoin
Sr. Rasmijn ta opera un compania di vending machines y e tabata haya interes den wak desaroyonan nobo den mundo di vending machines. “Un dia mi a wak cu tambe tin mashinnan di Bitcoin y esaki a babuca mi.” Pues sr. Rasmijn a busca un mashin di Bitcoin pa por trece esaki na Aruba.

Unabes sr. Rasmijn a cuminsa menciona Bitcoin y e mashinnan na otro personanan cu e conoce, nan tabata conseh’e cu mester tene cuidou cu Banco Central pasobra e instancia no lo ta habri pa acepta e tipo di tecnologianan aki.

Sinembargo ora sr. Rasmijn a acerca Banco Central, nan a comunica cu nan no lo tin problema pa e opera e mashinnan aki, mirando cu no tin ningun regulacion pasobra Bitcoin ta algo relativamente jong.

Ora mi a haya un aprobacion di e Banco Central e tabata hopi facil pa mi trece e mashinnan ki nan. Asina e mashinnan di Bitcoin na Aruba a cuminsa.”

Colaboracion di banconan
E hoben empresario ta contento cu Banco Central ta keda habri pa innovacion den espacio di finansa. “Den otro paisnan e ta pio, pasobra nan ta wak Bitcoin manera un scam ainda y esaki mi ta honestamente kere ta ridiculo. Mientras Banco Central di Aruba si ta wak cu nan lo por beneficia di e tecnologia aki.”

Mirando cu loke banconan ta preocupa pa verificacion si no ta uza Bitcoin pa actividadnan ilicito, sr. Rasmijn ta trahando riba verificacion via telefon di persona su identidad cu lo haci posibel pa tin un database di personanan cu ta uza e mashinnan. Entre otro den caso algo bay fout, mester reporta na banco.

Pero ora hende keda wak Bitcoin como un herment pa criminalnan por bende droga of evadi impuesto esaki ta lamentabel. Pasobra e dollar ta wordo uza pa un grupo di persona pa e mesun rasonnan aki. Pues nos no mester cera e portanan pasobra un grupo chikito lo uza esaki pa malo. Cualkier tecnologia por wordo uza pa maldad, esaki no ta nifica cu e tecnologia mes ta malo.” 

Alabes sr. Rasmijn no ta kere cu por bay completamente den e direccion di innovacion y no uza e banconan mes. “Mester tin un colaboracion si nos kier pa Bitcoin wordo adopta.”

Den futuro sr. Rasmijn lo kier expande su negoshi pa mas islanan den Caribe, pero esaki ta depende riba e colaboracion di otro banconan. “Pa awo mi enfoke ta pa haya mas capital pa asina keda na altura di tur innovacionnan tumando luga den e espacio aki. E rason cu mi ta inverti den esaki ta pasobra mi ta sinti cu aki 10 aña nos lo desea di tin e prijs di Bitcoin asina abou, teniendo cuenta cu e potencial cu e tecnologia tin.”

Uzo di Blockchain den futuro
Sr. Rasmijn no ta wak solamente e potencial di gana placa cu e tecnologianan nobo manera di Blockchain y Bitcoin, si no tambe un uzo cu lo por beneficia tur persona den comunidad. “E rason cu mi ta inverti den esaki ta pasobra mi ta sinti cu aki 10 aña nos lo desea di tin e prijs di Bitcoin asina abou manera e ta awendia.” 

Blockchain, cual ta e tecnologia tras di Bitcoin, ta un tipo di database cu ta wordo verifica pa tur partidonan den e red di e Blockchain. E manera con e Blockchain ta traha ta di manera sin centralisacion, pues cada partido den e red ta carga un copia di e database na tur momento. E database aki ta wordo actualisa automaticamente.

Sr. Rasmijn a subraya cu e tecnologia aki por wordo uza pa departamentonan di gobierno pa maneha y warda informacion di manera mas eficiente. “Cu e Blockchain bo por tin informacion disponibel te hasta den bo telefon, pues na cualkier momento por check e informacion y esaki ta haci tur proceso mas lihe pa e compania of organisacion y e cliente.”

Alabes esaki lo por nifica un desaroyo interesante pa Aruba mirando cu manera nos a reporta den pasado, e diferente departamentonan di gobierno no ta conecta cu otro. Pa hopi aña e proyecto di conexion entre departamento ta andando, pues posibelmente e Blockchain lo ta un solucion.

Di e manera aki bo no mester bay na diferente porta pa haya bo servicio. Pero tambe e computer no lo manipula informacion, solamente percura pa esaki ta disponibel.”

You May Also Like

15jesus (NW) (1).JPG

Falta 1 dia pa Aruba lo debuta den Weganan Paralimpico

Falta 1 dia pa Jesus de Marchena Acevedo lo debuta na Rio como prome ...

Restauracion di documentacion di Kerki Protestant

Un coleccion historicamente valioso awor ta den restauracion. Esaki ta ta trata di documentacion ...

1Sept EdM Problema lama (2).JPG

Cinco mucha a wordo rescata pa tripulante di compania acuatico

Diamars den careda di 5’or di atardi un persona atento a tuma nota di ...

Aruba Short Film Festival ta exhibi talento local

Ayera anochi a tuma luga Aruba Short Film Festival na Crystal Theater. Durante e ...

Hoben di 15 aña preparando su cunucu pa cuminsa planta

Cu tin un generacion nobo hopi interesa den planta y sembra na Aruba ta ...

Taray cerando rond di Paul Croes

Gobierno faltando opcion creibel Cu aresto ayera di secretaria di ministro Paul Croes, ta ...