Anouk Balentina lo sigui su lucha den Corte di Prome Instancia: “E ta pa bienestar di henter comunidad.”

Pa mr Anouk Balentina y su abogado mr Desiree Croes, e decision di Huez pa para e proceso di test e incinerator ta un logro chikito den un lucha mucho mas amplio y cu mester continua.

“Husticia prevalece den sentido cu berdad Huez Ton van der Leur a mira cu tabata hiba e testnan den un forma con ta contra ley,” ta locual Balentina a bisa ora cu sentencia a bira conoci.

Manera publica, Anouk Balentina a lanta un caso sumario contra Pais Aruba pa para e incinerator y tambe e actividadnan na Ser’i Teishi. E caso di Ser’i Teishi no mester a sigui ya cu a tuma e decision caba pa no sigui cu e trabou cu Caribbean Trucking. E compania aki tabata encarga pa hinca e baliñanan di sushi colecta pa Serlimar den e buraco na Ser’i Teishi. Tabatin hopi keho di e holo y molester di musca. Awor Serlimar a pasa e tarea pa Ecogas, cu ya caba cu algun restructuracion pa minimalisa e molester.

Hindervergunning

Aunke cu Balentina ta contento cu a para e testmento, hecho ta keda cu e proceso di pa yega na e hindervergunning ta sigui. Segun su abogado, e ta nifica cu lo sigui lucha. Prome cu por duna hindervergunning, lo mester papia entre otro cu Balentina cu ya caba a entrega un obhecion contra e incinerator na e dump di Parkietenbos. “E ta un henter un proceso cu mester cana ainda, prome cu yega na e vergunning, “ Croes a bisa. “Huez a bisa cu si Gobierno haya su permiso, anto lo mester instala banderanan pa mustra e direccion di biento. Pero, lo mester scucha e obhecionnan di sigur mi cliente.”

Incinerator

Y Anouk Balentina no ta kere cu ta na su luga pa instala un incinerator na Parkietenbos. Su argumento ta basa riba analisis di condicionnan bou cua por opera un aparato asina. Un incinerator no por ta cerca di un area residencial y esey ta netamente e caso cu Parkietenbos.

Berdad cu huez a indica cu pa por opera e incinerator, lo por inclui artefactonan pa determina direccion di biento, unda lo por para e mashin di kima ora biento bira, pa asina evita cu e gas cu ta produci bay direccion di e casnan. Pero esaki no ta suficiente, pasobra e no ta cumpli cu e standardnan di siguridad pa opera un incinerator. Balentina a bisa na varios ocasion, cu e ta di opinion cu por a instala e incinerator riba tereno di Refineria di Aruba, RDA, unda ya caba tin un otro incinerator pa kima droga.

“Director di Directie Wetgeving en Juridische Zaken, DWJZ, esta mr. George Croes a bisa hopi cla cu no por test sin un hindervergunning. Pero despues DOW a haya luz berde di parti di su suplente cu a dicidi otro.” Y awor Huez a rectifica esaki. Balentina, kende ta hurista su mes, a sigui bisa “y hasta si mester bin un permiso, e no ta nifica cu e ta basa riba legitimidad. Pasobra un proceso toxico asina ta contra derecho humano. No por ta posibel cu un dump y awor un incinerator ta den cercania di henter un bario.”

Much’i bario

Anouk Balentina ta subraya cu el a tuma e lucha pa su mes, pero na nomber di tur e habitantenan di Simeon Antonio, Kas di Paloma y Bucutiweg, y henter comunidad. Y e sa di kico e ta papia pasobra e mes a nace y lanta na Kas di Paloma y semper tabata exponi na e huma di dump. Awor berdad e tin siete aña ta biba na Bucutiweg. “A usa e cantidad di aña cu mi ta biba na Bucutiweg comosifuera cu ta awor mi ta confrontando e problema. Semper mi tabata exponi na e huma di dump.” E no ta considera cu Stichting Parkietenbos por papia na nomber di dje y otronan den bario, pa motibo cu casi no tin comunicacion cu habitantenan afecta y e directiva ta traha directamente cu Gobierno.

Salud Publico

E argumento contra e incinerator ta mas dirigi riba salud publico. E ta haya straño cu Huez no a considera e rapport di PAHO cu a conseha Gobierno pa cera y sanea e dump de immediato. E ta convenci cu su problema di salud y e asma di su yiunan ta a consequencia directo di dump. P’esey mes tambe el a spera cu Departamento di Salud Publico por a duna su opinion den e caso.

“E dia lo yega cu suficiente hende lo haya sa y ripara con grandi mi lucha ta. E ta uno digno y husto pa humanidad, salud y bida, “ Anouk Balentina a declara.

Demanda

Siguiendo ehempel di un caso similar na St. Maarten, el a pidi un compensacion pa daño. Esaki tabata parti di un suma cu den su concepto lo mester bay pa un organisacion di naturalesa. “Ami no a pidi placa pa mi mes. E caso aki no ta pa enrikece mi mes. Huez sinembargo a determina cu si Gobierno no cumpli cu su sentencia, lo mester paga e daño na Cruz Cora, den luz di e crisis di Covid.” Locual si Balentina a pidi ta un realocacion temporal, manera Gobierno den pasado a haci cu otro famianan. Den su caso, el a pidi pa un realocacion di un aña pa permiti’e e tempo pa traha un otro cas y asina muda definitivamente di e bario unda el a nace, lanta y biba. Y tambe el a pidi compensacion pa e gastonan cu el a haci pa instala airco den sala di su cas y e compra di un purificador di aire special pa camber di su yiunan. “Nos no por habri bentana aki.” Pero Huez no a bay de acuerdo cu e peticionnan aki. “Mi no a haya nada locual mi a pidi pa ami mes.”

Tarea di Parlamento

E siman aki Balentina a entrega un peticion na Presidente di Parlamento mr. Ady Thijsen contra dump. Su accionnan a cuminza for di tempo di Gobierno anterior y ta continua te awor. Y p’esey mes, e ta hopi desapunta cu Parlamentarionan ta djis limita nan trabou pa haci pregunta y nada mas. “Di con ningun Parlamentario ta haci uso di su autoridad pa bin cu leynan na interes di habitantenan di Parkietenbos y becindario? Aña den, aña afo, tur gobierno ta lanta un grupo di trabou nobo cu yen di plan pa Parkietenbos, pero nunca ta ehecuta nan. Y tur esaki ta bay a costo di salud di e comunidad y bida di hende. No tin ningun ley di medio ambiente pa midi calidad di aire, midi salud. No tin ningun ley unda derecho di hende, bida, salud y medio ambiente den e cuadro aki ta suficientemente salvaguardia.” Balentina ta puntra si Parlamentarionan ta realisa cu habitantenan di Parkietenbos tambe ta forma parti di comunidad di Aruba, en todo caso, cu ta parti di e representacion den Parlamento tambe. “Of kizas Parkietenbos, medio ambiente, salud di hende, sostenibilidad, e SDG’s y derechonan humano no ta asina importante pa e organo legislativo eligi democraticamente?”

Bodemprocedure

Pero e lucha no ta para. Abogado Desiree Croes a bisa cu awor e caso ta bay pa un asina yama bodemprocedure, esta ta bay presenta e caso na Corte di Prome Instancia, unda ta bay inclui mas peticion y demanda, cu ta inclui e realocalisacion. Pero e meta ta pa kita e incinerator di e luga indica y sanea dump a lo largo. E caso sumario tabata basa interes general. Pero e siguiente paso ta pa enfoca riba salud publico y daño ocasiona. “Ohala pronto husticia por prevalece pa Parkietenbos tambe por hala rosea. Ohala cu dia cu ami no tey mas pa sigui e lucha, cu pueblo ta suficientemente consciente cu mester haci algo y nan por continua cu e lucha pa bienestar di tur,” ta locual Anouk Balentina a conclui.