Apertura historico na Fort Zoutman Diaranson anochi

Den Februari, un grupo grandi di musico di Aruba bao di e maneho di entre otro Jonathan Viera y Aaron Hose, a biaha bay Manhattan,NY pa realisa un grabacion di nos Himno Nacional ”Aruba Dushi Tera”. Esaki ta un homenahe na gobernador di Aruba Fredis Refunjol na ocasion di su termino final como gobernador. E grabacion aki tabata acompaña cu un Orquesta Sinfonico y musiconan di Aruba.

Diaranson anochi a organisa un apertura na Fort Zoutman caminda tur e musiconan di Aruba a bini hunto pa asina presenta e entrega oficial di e regalo na e ocasion tambe di e di 40 aniversario di nos Himno Y Bandera. Segun Jonathan Viera, si e por haci algo asina grandi pa Aruba, otro musiconan tambe por haci mescos y tambe hasta miho. E ta sigui splica cu e unico cos cu ta importante ta pa bo haci un bon trabao, demonstra cu bo merece locual bo kier.
Si bo ta un artista local, haci un bon grabacion y pone esfuerso den bo trabao anto sigur cu bo ta bay yega mas leu di loke bo ta pensa, Viera ta bisa.