Van Aanholt (6).jpg

E prome dia di e competencia den e disciplina di Laser Radial ta tras di lomba unda Aruba su representante Philipine van Aanholt a competi. Mester bisa cu den e competencia di Laser Radial un total di 37 pais a clasifica pa e Weganan Olimpico di Rio. E competencia a tuma luga den un di e bahianan mas comenta e ultimo aƱa na mundo esta Marina Da Gloria. 

 Den e competencia aki cada dia lo competi riba dos rond esaki 5 dia largo. Dialuna Philipine ta inicia e competencia den forma aceptabel unda den e prome rond e ta yega na un di 25 luga mientras den e di dos rond Philipine ta termina na un di 21 luga. Mester bisa si cu Philipine a logra na comienso pega bon cu e top mundial unda cu dado momento e tabata na un di tres luga y segun e careda ta avansa den e top 10.

 Den un combersacion cu e atleta van Aanholt e la conta nos cu na comienso e la sinti su mes perfecto y e sa cu e por duna mucho mas pero e mester keda concentra cien porciento. E mes ta sinti cu e por duna mucho mas y por termina entre e miho 15 competidornan. Na banda di esaki segun van Aanholt e condicion di tempo no tabata esun mas faborabel pa su persona, e biento fuerte a hunga un rol grandi e prome dia cual a stroba y afecta su prestacion. Ta bon pabisa aserca cu Philipine den e heat number dos a haya strafpunt pero a protesta contra e desicion y a gana esaki na final. Lamnetablemente e no a cambia su posicion den e overall standing. Pa loke ta e overall standing Philipine ta na un di 26 luga den 37 participante cual ta un bon resultado te cu awor. E pais di Hulanda ta lidera e competencia sigui pa Dinamarca y Ireland. E competencia falta 4 dia mas pa bay aki na Marina da Gloria na Rio de Janeiro, Brasil

LEAVE A REPLY

Please enter your comment!
Please enter your name here