Parlamento mester percura pa conoce tur riesgo y obligacion prome cu aproba proyectonan PPP

E maneho di Green Corridor y Watty Vos Boulevard ta na ordo, pero mester mehora e suministro di informacion na Parlamento tocante e riesgonan financiero y e forma con ta cubri e proyectonan den e presupuesto y financieramente. Asina Auditoria General di Aruba, Algemene Rekenkamer Aruba, ARA, ta bisa den su rapport ‘Cooperacion Priva Publico’, conoci como Public Private Partnership, PPP.

ARA a haci e investigacion pa duna Parlamento bista riba con a prepara e proyectonan y con ta maneha nan. Banda di esey, e rapport ta duna Parlamento bista den e caracter specifico di e tipo di construccion di cooperacion publico-priva di largo duracion, unda e responsabilidadnan entre Pais Aruba y e partido priva ta haya otro forma compara cu contratonan tradicional.

Guia pa PPP den futuro

“Pero mas cu tur cos, ARA kier saca les pa futuro. E ta importante pasobra den e proximo añanan tambe tin interesnan financiero grandi mara na e proyectonan aki y e investigacion di ARA ta duna guia pa mira con ta anda cu e proyectonan PPS actual y den futuro.

E construccion di Green Corridor y Watty Vos Boulevard lo mester conduci na un miho ambiente di biba, promove desaroyo economico, reduccion di polucion di aire y evita situacion di trafico insigur. E metanan aki ta cuadra cu e Sustainable Development Goal (SDG) number nuebe, cu ta: construccion di infrastructura resiliente, promocion di industrialisacion inclusivo y duradero, y stimula innovacion. Cooperacion Publico Priva por contribui na esaki. Pero, unicamente si ta cumpli cu condicionnan.

A investiga si e partidonan a y ta tene nan mes na e acuerdonan di e contracto y si tabata tin suficiente bista riba e riesgonan financiero. Tambe a investiga si e informacion suministra na e partidonan envolvi, cu ta Parlamento, e Ministernan, departamentonan gubernamental y contratista, ta di tal forma, cu cada uno por carga y realisa su responsabilidad.

ARA a conclui cu e maneho di ambos proyecto ta bay bon. Pero ta e comunicacion riba riesgonan financiero na Parlamento ta keda un poco atras. Tambe mester percura pa mehora e colaboracion y e intercambio di informacion entre e departamentonan gubernamental di Pais Aruba, esta DOW, Ministerio di Infrastructura, Direccion y Ministerio di Finanzas. Mehoracion den suministro di informacion ta necesario pa esnan responsabel por carga nan responsabilidad pa e proyectonan PPP aki, pa di e forma aki e proyectonan por termina di forma exitoso.

Lesnan

Maneho di contracto riba e componentenan cu a investiga tambe ta cuadra, segun ARA. Particularmente a menciona cu na inicio di e proyecto Green Corridor tabatin problema, pero locual ARA a analisa ta canando bon. E tabata un exigencia tambe di Pais Aruba.

E lesnan cu Pais Aruba a siña di e proyecto Green Corridor, a pone den practica na inicio di e proyecto di Watty Vos Boulevard. Asina a preveni cu a comete e mesun erornan na inicio di e proyecto aki. E intercambio di informacion entre e dos contratista di e proyectonan y Pais Aruba, ta suficiente pa por cumpli cu e funcion y responsabilidad. Tin suficiente bista riba e riesgonan den maneho di contracto y DOW a aplica un maneho activo di multa. E reto ta pa keda skerpi riba e maneho di contracto y pa mantene e

conocemento adkiri den e organisacion.

Esaki ta nifica un financiamento solido, tambe riba termino largo, cu ta pas den cuadro presupuestario y e normanan financiero di Pais Aruba.

Riesgonan no ta bon cubri

Di otro banda, ARA ta bisa si cu e riesgonan financiero di e proyectonan PPP no ta suficientemente cubri ainda. Na comienso di e proyectonan no tabata tin claridad riba cobertura di e gastonan a largo plaso. Te na e November 2019, ainda no tabatin claridad riba esaki.

Pais Aruba a introduci temporalmente un belasting adicional pa cubri e proyectonan di PPP. E entradanan aki,como impuesto, sinembargo no tin un destino specifico. Ta importante pa percura cu pa futuro proyecto, tin informacion disponibel di tanto presupuesto como tambe di financiamento, specialmente riba termino largo. Esaki prome cu Parlamento aproba e ley y gobierno cera e compromiso, ARA a bisa.

‘Off-balance’ ta keda debe di Pais Aruba

Pa motibo cu e financiamento di e proyectonan aki ta asina yama ‘off balance,’ e compromisonan financiero aki no a afecta e posicion di debe di Pais Aruba na comienso di e proyecto ( red. off balance ta nifica cu ta pone algun elemento, tanto pasivo of activo for di e balance di Pais Aruba. Aunke cu no ta registra den e balance, nan ta sigui ta activo y pasivo di Gobierno. Locual por laga afo di e balance ta elementonan cu no ta propiedad di Gobierno of obligacionnan directo mara na e elemento).

Pero den e siguiente 18 añanan mester carga e gastonan pa uso di e camindanan aki pa medio di presupuesto di Pais Aruba. Door cu e financiamento di e proyectonan aki ta off balance, e no ta afecta e debe di Lo mester cubri esakinan cu entrada adicional y of reduccion di gasto. Mester considera cu cautela e concepto di tene e proyectonan off balance. No ta pasobra por haci esaki, ta prudente pa tuma e rumbo aki, ARA ta mustra den su rapport.

Suministro di informacion na Parlamento ta insuficiente

Suministro di informacion na Parlamento den e rapportnan actual, no ta suficiente

concentra riba datonan cu Parlamento mester pa por haci su trabou debidamente, ARA ta bisa.

Por ehempel, tin hopi informacion detaya y poco informacion riba riesgonan financiero a

largo plaso y e medidanan pa limita e riesgonan aki. Parlamento no ta haya un bista

completo di e gastonan y tampoco ta haya informacion presupuestario y di

financiamento riba termino largo.

Mehora intercambio di informacion interdepartamental

Den concepto di ARA, mester por mehora intercambio di informacion entre e departamentonan gubernamental cu ta cay bou Minister di Infrastructura y e Minister di Finanzas. E papel di Direccion di Finanzas actualmente ta demasiado dependiente y reactivo. ARA ta bisa den su rapport, e instancianan bou di e dos Ministerionan mester traha hunto pa percura cu Parlamento ta ricibi e informacion necesario y completo.

Recomendacion

ARA como tal ta recomenda Ministernan di Infrastructura y di Finanzas pa traha rapportnan integral pa Parlamento, unda no unicamente ta duna ilustracion di e progreso, pero tambe riba maneho, gasto, cobertura financiero y e riesgonan a termino corto y largo. E rapportnan aki mester contene tambe e medidanan pa limita y mitiga riesgo y mester duna un bista pa futuro. Ta hopi importante pa Ministerio di Infrastructura, DOW y Direccion di Finanzas colabora hunto riba e informacionnan aki pa Parlamento.

Tambe ARA ta kere cu mester Inverti den desaroyo y conservacion di conocemento na DOW, unda por pensa riba un maneho di personal proactivo, educacion (adicional), y pa transferencia di conocemento pa locual ta trata e maneho di contracto di e proyectonan PPP.

(Articulo ta continua riba pagina 6)