Como ex-maestro y Parlamentario di MEP, Edgard Vrolijk a entrega un iniciativa di ley (Landsverordening studieleningen) na Parlamento di Aruba. E ley ta modernisa e sistema di studielening y ta habri un caminda concreto pa “kwijtschelding” di debe pa e graduadonan cu ta contribui na desaroyo di Aruba

E iniciativa di ley Landsverordening studieleningen cu Parlamentario di MEP, Edgard Vrolijk a entrega e siman aki na Parlamento di Aruba, ta nace directamente for di su experiencia den enseñansa. Vrolijk a expresa: “Durante mi añanan den enseñansa, mi a para dilanti di diferente klas y mi a biba di cerca con studiantenan talentoso a desisti di sigui studia, pasobra nan no tabatin e medionan financiero. Tambe mi a mira con otronan, despues di hopi sacrificio, a bolbe Aruba carga cu un debe di estudio asina grandi cu tabata hacie casi imposibel pa nan keda biba riba nan isla. Esaki no ta un problema di estadistica, sino un problema real di nos futuro como pais.”

Kico e ley ta cambia?

E sistema actual di studielening ta basa riba un articulo den e presupuesto di aña 2006, un fundamento legal cu a keda atras di e realidad actual. E ley nobo ta unifica tur aspecto crucial, manera e prestamo, e condicionnan di pago y e posibilidad di kwijtschelding di debe, bao di un solo cuadro legal moderno y transparente. E propuesta aki ta introduci varios cambionan grandi.

Prome, e ley ta permiti cu un studielening por tin un periodo mas largo cu cinco aña, algo cu ta necesario den caso di estudio superior cu ta dura largo y cu ta exigi un plan di pago mas realistico. Di dos, e kwijtschelding ta 50% di e debe habri, pa graduadonan cu a caba y ta traha na Aruba of cu a bin biba back dentro di 5 aña despues cu a termina su estudio den exterior y cu ta cumpli cu e condicionnan di e ley.

Ademas, e ley ta stipula un descuento di 30% adicional pa esunnan cu paga nan debe den un solo pago, y un kwijtschelding di 100% den casonan special, manera fayecimento, invalidez permanente, of malesa cronico.

E cifra ta papia cla

Segun datonan di Ministerio di Finanzas, di e casi 395 miyon florin cu a ser otorga na studielening, apenas cerca di 5 miyon florin ta wordo paga back pa aña. E realidad aki ta demostra cu e problema no ta falta di boluntad pa cumpli, sino cu e carga financiero ta demasiado grandi y e condicionnan pa kwijtschelding ta demasiado restrictivo, un situacion cu e ley nobo aki ta bin atende directamente.

Pa Aruba, no solamente pa e studiante

“Un pais cu ta inverti den estudio di su hobennan y despues no ta crea condicionnan pa nan bolbe, ta perdiendo di dos banda”, Vrolijk a reitera. E ley aki ta un instrumento pa conecta inversion publico cu necesidad real di nos mercado laboral. E enfoke principal di e propuesta aki ta pa crea un beneficio dobel. Pa e graduadonan, e ta nifica un reduccion directo di nan presion financiero despues di estudio, motivando nos hoben profesionalnan pa regresa of keda aporta localmente. Pa Aruba, e ganashi ta strategico: e conocemento cu pais Aruba a yuda financia ta keda den nos comunidad, specialmente den sectornan caminda tin un gran falta di personal, manera enseñansa, salud, infrastructura, turismo y tecnologia.

Condicionnan pa kwijtschelding di 50%

Pa bin na remarc’e, un graduado mester a termina estudio riba of despues di 30 october 2015, completando esaki dentro di e duracion nominal of e periodo autorisa di e lening. E graduado mester ta trahando na Aruba of cu e condicion cu si e estudio a tuma lugar pafo di e pais, e persona mester a bolbe biba oficialmente na Aruba dentro di cinco aña despues di a gradua.

Documentacion rekeri: E solicitud aki mester bay acompaña pa un copia legalisa di e diploma of certificado oficial, un prueba di inscripcion den registro civil y un declaracion oficial di e doño di trabao.

Proximo paso

E Ley (Landsverordening studieleningen) mester wordo trata ainda den sala di Parlamento. Mi ta spera di curason cu coleganan den parlamento sostene e ley aki, paso esaki no ta pa un partido politico pero pa nos hobennan.