Areglo di disputa atrobe den atencion. Pero no ta yega na consenso…

Atrobe tin e consulta bi-anual entre e parlamentonan di e paisnan den Reino, y atrobe ta bay delibera riba e areglo di disputa entre e partnernan den Reino.

Y atrobe e ta parce di bira un discusion poco util, pasobra e partidonan no lo yega na otro. E tres islanan ta desea un organismo cu ta duna un veredicto final, mientras cu Hulanda, cu normalmente ta domina e scenario den Conseho di ministro di Reino tambe, no tin gana di depende di decision di un organismo cu nan no ta controla. Y esaki no ta bay cambia, al menos, esey ta nos interpretacion. Y e motibo pa pensa esaki ta entre otro, cu a lo largo di nos historia comun durante e ultimo decadanan bao di Statuut, e grito pa un areglo di disputa tabata bira mas fuerte, cada biaha cu un di e islanan ta haci cos robes, y ta busca apoyo di e otro islanan, pa para mas fuerte contra Hulanda pa e medidanan tuma for di Den Haag pa resolve o coregi un problema cu ta rekeri nan intervencion, segun nan opinion.

Den e tipo di situacion asina, ta logico cu e gobierno insular tambe ta kere cu nan tin rason y ta busca di forma aliansa pa purba para fuerte. Pero nan tabatin rason, den e casonan concreto, den cual Hulanda a tuma paso? Un analisis di e casonan concreto di intervencion di Hulanda, bao di e capa di conseho di ministro di Reino, ta mustra nos cu tabata trata di asuntonan sumamente grave, unda tabata atenta contra e interesnan no solamente y ni na prome luga di Reino, o di Hulanda, pero di e isla concerni mes. Y esey ta logico tambe, pasobra ora un gobierno insular ta atenta contra interes di su propio pais y pueblo, ta ken mester interveni na interes di nos como ciudadano Hulandes?

Naturalmente nunca lo ta asina cu henter pueblo lo aproba e pasonan cu gobierno di Reino ta tuma ora nan ta haya cu nan mester actua contra un gobierno local; semper lo tin un parti di e poblacion cu ta haya cu e gobierno insular tin rason y cu mester enberdad busca aliado entre e otro islanan pa forma frente contra Goliath. Pero tabata asina cu den e casonan di intervencion, e gobierno insular por a conta cu un mayoria di pueblo aprobando nan actuacion? Nos ta kere cu no. Algun ehemplo concreto.

Tempo cu despues di hopi aña di duda, di vacila, di teima, gobierno di Reino a interveni na St. Maarten na 1992, contra corupcion na grandi cu pa e tempo ey tabata legendario caba. Mas reciente, atrobe e corupcion legendario ey a lanta cabes, nunca realmente a desaparece completamente, y atrobe a tuma paso. Ken di nos tabatin gana di bay apoya e politiconan corupto di St. Maarten den nan eventual guera cu Den Haag?

Algun aña pasa, un gobierno nobo na Curaçao ta cuminsa cu ripiti e hazaña cu e ministro di husticia na Aruba na 1994 tambe a purba pero no a logra: pone man riba contenido di archivo confidencial di Servicio di Inteligencia. Na Aruba e tempo aya Hulanda a interveni, a pone e archivo di e Servicio te na base di Marina Real na Parera y e ministro a haya e honor dudoso di e prome KB duna na Aruba. Finalmente a tira awa den biña, e ministro por a keda, pero henter e asunto a costa dos funcionario policial halto nan trabao. E mandatario di Curaçao si a logra y Hulanda a tarda pa interveni, den algo cu obhetivamente tabata un violacion flagrante di tur loke mester ta sagrado pa un mandatario. ‘No hay mal que por bien no venga’ pasobra mientras tanto ‘het jongetje dat niet wil deugen’ tin un condena di algun aña di prizon ta ward’e.

Despues a bin e caso di e situacion financiero di Aruba na 2014, cu a haya su propio tragicomedia di welga di hamber. Nos sa con esey a caba, nos ta sintie ainda den forma di supervision financiero, cu ta bay dura varios aña mas, pasobra hiba e pais aki atrobe den awanan financiero mas calma ta bay dura mas di un decada.

Pero e pregunta clave den tur e casonan aki ta: Hulanda no mester a interveni? Nan mester a keda cu nan brasa crusa y para wak con gobiernonan insular ta abusa di nan pueblonan? Nan mester para wak sin haci nada, pa miedo di keda acusa di ta colonial o neo-colonial, y permiti cu gobiernonan insular ta trapa delaster un norma di bon gobernacion, solamente pasobra e ta conveni nan como politico? Den tur e casonan menciona nos por bisa, den e ultimo caso di Aruba sigur, cu un mayoria di pueblo no a aproba e show di malcria cu nos mester a presencia, di e mandatarionan local.

Cu tur esaki nos kier bisa cu no mester un areglo di conflicto anto? Nos por tin un areglo di disputa, por si acaso. Pero cu e ta un prioridad grandi, pa e pueblo, no. Pa e politico cu ta desea un arma extra contra Den Haag, e por tin prioridad.

You May Also Like

Empleado tin ultimo palabra?

Encuesta ta un instrumento tricky Nos a topa cu un discusion interesante e siman ...

Si t’ami, mi lo a baha…

Nos no por bisa cu nos a keda perpleho diabierna ultimo, durante un entrevista ...

Fundacion enseñansa publico ta prioridad?

Ta kita atencion di otro prioridad… Den tempo record e intencion di e ministro ...

Porfin ta admiti epidemia di Zika

Porfin e momento supremo a yega cu autoridadnan di salubridad publico a bay prensa ...

Cas di Siguridad ta un bon inicio. Pero tin hopi cos pa sigui

Ayera nos a haya un iniciativa nobo gubernamental, cu ta algo ‘long overdue’ pero ...

editorial 2_15_1.jpg

Hues ta bati riba man di ministro atrobe Pero no tin cambio di actitud…

Pa di tantisimo biaha den e ultimo lunanan un hues ta condena gobierno, y ...