(AFP) – Arkeologonan a descubri un graf 3 mil aña bieu cerca di e ciudad Luxor na Egipto, segun autoridadnan a bisa ayera, e desaroyo mas recien den un serie di descubrimento cu oficialnan ta spera ta bay reforsa turismo.
E graf, identifica como perteneciendo na un homber yama Paser, a ser haya pa un mision arkeologico Hulandes di Universidad di Leiden den e necropolis Sheikh Abd el-Qurna den West Bank di Luxor, segun ministerio di Turismo y Antiguedad di Egipto.
Specialistanan ta kere cu e graf ta bay back na periodo Ramesside, cu ta acapara e di 19 y di 20 dinastia Egipcio, basa riba e estilo artistico di su inscripcionnan.
Ubica den oriente di un sitio di entiero conoci anteriormente, e graf ta sigui e layout tradicional di graf Theban priva di e Reino Nobo (1570-1069 BC), nan a agrega.
E ta consisti di un patio habri conduciendo na un kapel corta den piedra den forma di un T inverti, cu camaranan di entiero corta na nivel di superficie.
Arkeologonan a haya varios elemento arkitectural bon preserva den e patio, incluyendo un banki diseña pa tene un stela funerario y un trapi conduciendo na e entrada.
Paden, e inscripcionnan cu nomber di Paser a mustr’e adorando varios dios den santuario, como tambe uno sinta cu su esposa dilanti un mesa di ofrenda.
E team di excavacion a bisa cu mas documentacion y estudio ta bay continua pa asina por determina ken tabata dera den e graf, y pa compronde miho su contexto historico y arkeologico.
E descubrimento ta yega mientras Egipto ta busca di promove hallazgonan arkeologico nobo pa sostene turismo, un fuente clave di divisa pa e pais.
Luxor ta sede di algun di e monumento antiguo y sitio arkeologico mas significante.
Potret di ilustracion.
