Arma espacial nobo di Merca ta amplia arsenal pa enfrenta Rusia y China

(Infobae) – Revelacion di Forsa Aerea e siman aki cu Merca awo tin un arma den espacio a causa hopi speculacion, pero a laga poco contesta tocante capacidadnan di e dispositivo.

“Asina hopi cu boso kier sa, Beijing kier sa ainda mas,” Teniente General Greg Gagnon, comandante di Space Force Combat Forces Command, a bisa diaranson. E comando aki ta responsabel pa entrena personal pa opera sistemanan manera e arma aki den orbita.

Secretario di Forsa Aereo Troy Meink a anuncia durante un conferencia dialuna cu Merca awo tin un arma espacial destina pa proteha forsanan Mericano. E anuncio a provoca un advertencia for di Ministerio di Asuntonan Exterior di Rusia tocante “consecuencianan sumamente serio” si e arma ser usa.

E dispositivo ta e componente den orbita di e arsenal espacial actual di Merca, cu te awo principalmente tabata consisti di sistemanan di interferencia basa riba tera, diseña pa interumpi temporalmente — pero no destrui — comunicacion di satellitenan Chines y Ruso.

E sistemanan actual di interferencia ta conoci como Counter Communications System, un arma grandi cu antena satelital cu ta opera desde 2020; un modelo mobil mas chikito yama Meadowlands, cu ta operacional desde juli; y un sistema ainda mas mobil yama Remote Modular Terminal, cu ta cerca di ser implementa completamente.

“Nos no lo papia tocante detayenan specifico di loke nos ta haciendo — si nos a test e, si nos no a test e, of cualke otro cos,” Meink a bisa na periodistanan dialuna despues di e revelacion.

Ora nan a puntra Gagnon con e nobo capacidad den orbita ta encaha cu e arsenal actual, e a señala cu “tur sistema di arma ta complementa otro y ta integra ora bo sincronisa nan den operacionnan militar.”

Sinembargo, “esaki ta basa den espacio, pues ya esey ta haci e diferente,” Victoria Samson, analista di armanan espacial na Secure World Foundation, a bisa.

“Tin reportahenan cu ta indica cu China y Rusia probablemente tin sistemanan di interferencia espacial y tabata parce mi straño cu nos no tabatin nan,” el a agrega.

Samson tambe a bisa cu sistemanan di interferencia por ta mas facil pa coloca den orbita cu armanan di laser of armanan cu ta usa rayonan di particula.

Ainda, si Merca simplemente implementa sistemanan di interferencia cu temporalmente ta blokia of ciega un satelite Chines of Ruso, “e impresion por keda cu Merca posiblemente no ta dispuesto pa usa armanan cinetico den espacio fisico,” Clayton Swope, specialista den espacio y aeronautica na Center for Strategic and International Studies (CSIS), a bisa, haciendo referencia na tecnologianan cu tin mas poder destructivo.

Politica tocante residuo espacial

Na 2022, Merca a compromete su mes pa no haci pruebanan destructivo cu misil antisatelite di ascenso directo.

“Esaki ta un compromiso hopi specifico,” Swope a bisa.

“E idea tras di e moratorio specifico riba e tipo di prueba ey tabata cu no tin ningun motibo pa crea residuo cu por pone uso di espacio durante tempo di paz na riesgo,” el a continua, agregando cu “durante guera ta un otro historia.”

Gagnon a bisa diaranson cu politica di Merca cu ta prohibi generacion di residuo espacial ta aplica na pruebanan, aunke e no a yega na bisa cu e prohibicion no ta aplica na e nobo arma.

“E motibo cu nos tin e capacidadnan aki ta pa contribui na disuasion,” Gagnon a conclui. “Ora bo bay guera, bo ta destrui cosnan.”