XOD “El Multitalentoso” ta un artista di Aruba cu tin basta tempo den e plataforma di musica Urbano cu un par di logro cu kisas no mucho conoce.

Aunke e aña aki loke ta e mundo di entretenimento a conoce un fin di adaptacion y cambio, XOD for di 2018 tabata residencia na Colombia explorando tur posibilidad di cual e la haya su ‘break tambe na e pais menciona.

Aki ta unda e ta logra fortifica mas su material discografico como tambe su aparicion cu su video clip cu e tema titula “Me tienes mal” cu e co-aparicion di un artista Colombiano.

Tambe e la figura cu su temanan na emisoranan na Colombia, di cual su exito mas pega por ehempel na Jumbo Stereo ta titula “Piensa en sex” y esaki tabata na 2015. Esaki a wordo pega pa peticion di audiencia via mensahe nan riba internet y concurso nan di emisora nan mas renombra cu ta cubri mas di 8 miyon di audiencia den tur e 3 estado nan Cali, Yamondi cu e area di Palmira.

Na 2012, XOD ‘El Multitalentoso’ a figura cu e grupo di ‘Extreme Production’ na Venezuela y esaki a pone un streya mas tras di su nomber como e prome artista Urbano Arubano cu ta logra drenta e plataforma di H-TV cu e tema titula “alocate” cu por cierto a haya mas di 2 Miyon ‘uploads’ den media share files durante su prome luna cu mas di 50 mil comentario.

Manera XOD a remarca na nos, e ta trahando actualmente cu “Dloudness” Un producer na e capital di Colombia Bogota , mes tempo XOD ta trahando cu producer di Aruba John Ortega.

Na e aña aki 2021 despues di cuarentena XOD a lansa dos tema nobo ‘Quarentena’ y ‘Dejavu’ esaki nan a wordo acepta pa mas di 29 plataformanan digital. Rond mundo tin expectativa grandi junto cu su team ‘ The Unity’ esey mes lo ta titulo di album actual, y Temple Music ta Un Compañia nobo trahando den e industria di musica rond mundo. Pa e aña aki y e aña nan entrante.

Temple Music ta un compania cu Gloria Acosta como directora, cual a crece hopi e aña aki. El a uni forsa cu Angelo Maduro, cual ta nomber di XOD. Nan a cuminsa traha riba e proyecto aki for di cuminsamento di aña “door di hopi situacionnan cu a pasa y nos a pensa cu e unidad mester nace, tras di tur e talento cu Angelo tin, y su tras tambe tin un meta di unda nos kier yega,” Angela a expresa, agregando cu “esaki tabata un proyecto di hopi esfuerso pa Angelo, ami y mi compania holistica cual a apoya e proyecto aki.”

Diabierna, dia 19 di november XOD lo lansa 2 cantica nobo riba 29 plataforma internacional, cual ta un logro grandi pa tanto Temple Music y XOD, ken tabata soña di por lansa como solista. “El a dura un tempo fuera di musica, pero esaki tabata pa motibo cu e tabata trahando riba su proposito.”

E ta un logro grandi di por lansa dos cantica riba plataforma internacional como solista, un di nan “Cuarentena” unda cu Angelo ta expresa su mes y e experiencia cu el a pasa fuera di musica, “nunca Angelo a sali for di su musica, e tabata dedica su tempo liber riba esaki. E ultimo 6 pa 7 luna aki e tabata un trabao intenso tanto fisico, emocional y profesionalmente, pero awe ta un orguyo cu nos por logra haci esaki.”

The Unity ta e forsa di Gloria y Angelo, tras di cual nan tin un proyecto di servicio unda cu parti di e fondonan cu ser acumula cu tempo, lo bay na un fundacion unda cu nan kier ofrece na muchanan di 8 aña en adelante, por ricibi di apoyo emocional di personanan indica cu nan lo tin disponibel pa nan uso. “Tanto den su bida como esun di mi persona, nos ta kere cu esaki ta hopi importante, pa motibo cu ora un mucha di 8 of 9 aña cuminsa siña mas di su autoestima y respet pa su mes, ora cu e yega na edad di adolescente e lo ta prepara pa loke e lo mester enfrenta den bida,” Gloria a conta.

Esaki ta algo cu ta cuminsa awo, pero lo sigui bay dilanti. “Mi ta spera cu mi por haya e apoyo di e pueblo di Aruba. Mi spera di haya tambe apoyo di fundacionnan, y personanan. Esaki ta algo cu a naci di mi persona y Angelo, y nos sa cu esaki lo por beneficia hopi persona.” Gloria a clausura.