Caithlyne Kock: Dedica tempo na bo estudio cual ta e jabi pa bo futuro!

Caithlyne Monique Gabriela Kock ta ruman mas grandi di Cristalyne y Carolyne. E tin 12 aña di edad y ta studia na Colegio Nigel Mathew (HAVO).

Su hobbynan ta Modeling, Syncronize Swimming, Chat cu Amiganan.

Caithlyne tin hopi logro riba su nomber manera; Reinita Checkpoint Color, Mini Miss Frozen, Baby Miss Aruba, Little Princess Aruba, Best Gala Dress, Best Talent, Baby Model International na Republica Dominicana, Best Talent International, Medaya di Oro di UANA TEAM Aruba Syncronize Swimming.

Kiko mi kier bira ora bira grandi?

Ainda mi no ta define pero lo ta algo den accounting y mi soño di mas grandi ta pa bira un Professional

Model riba pasarella nan Internacional pa brands nan grandi.

Kiko bo ta gusta di bo mes?

Ora mi pone un meta mi dilanti mi ta bai pe cu tur mi esfuerzonan. Y hopi biaha mi ta logra.

Kiko bo ta hasi ora bo ta sinti tristo?

Hopi biaha mi ta sinta reflexiona kiko por tawata e problema y con pa solucione.

Ken ta mi mihor amiga of amigo y dicon?

Mi mihor amiganan di scol ta Jeanedy y Lufy, paso di Chikito nos ta hunto.

Kiko ta bo mensahe pa tur e muchanan di Aruba?

Zorg pa bo por dedica tempo na bo mes, bo estudio cu ta e jabi pa bo futuro. Kere den bo mes y tur bo cualidadnan.

Caithlyne, Cristalyne y Carolyne ta juinan di e conocido reina di beyesa di Aruba Chastity Kock-Hodge. Chastity ta directora di Scol di Modelahe y Talento ‘The Chaz Modelling & Talent School, situa na Savaneta, cual tin 23 aña di existencia. Actualmente e skol ta consisti di un total di 55 mucha y hoben entre edad di 4 pa 20 aña. E institucion ta brinda e muchanan e oportunidad di desaroya nan mes den modelahe y baile pero tambe ta siña nan con pa expresa nan mes mihor door di usa na expression di cara y curpa y tambe con pa papia den publico. Apart di esaki nan ta duna asistencia na reinanan di beyesa tambe.

Diadomingo 21 di November ‘The Chaz Modelling & Talent School’ lo tene su famoso talent show ‘Back on Stage’ cual lo tuma lugar na renaissance Convention Center cuminsando pa 5:30pm. ‘The Chaz Modelling & Talent School kier invita henter pueblo di Aruba pa asina apoya nos muchanan nos talentonan local.

Pa mas informacion bishita nan facebook page ‘The Chaz Modelling & Talent School of jama 560.4567

Jennyraine Maduro: No worry pa ‘Fit in’ simplemente sea bo mes!

Jennyraine tin 14 aña  di edad y ta den Ciclo Basico 2 di Colegio Arubano Oranjestad. Apesar cu su hobbynan ta modelahe y baile e ta practica e deporte di Taekwondo tambe. E ta un ehempel cla cu un mucha muhe por ta fini y glamoroso pero tambe fuerte na mesun momento.

Jennyraine a jega di particpa den hopi concurso y tin hopi corona y logro riba su nomber manera;

2012 Little princess Aruba, 2013 Baby beauty world international (Republica Dominicana), 2015 Little Miss Aruba, 2016 Mini model Aruba y na aña 2016 a biaha pa Santo Domingo y a logra First finalist of the world. Tambe na 2018 a representa Chaz modeling & talent school den categoria di Prenda cultural y a logra: Prenda folklore, prenda fotogenica, prenda trahe tradicional. Jennyraine a cuminsa mundo di modelahe y baile desde su 5 aña y logra bay cu varios titulo di best talent show tambe.

Kiko bo kier bira ora bo bira grandi?

Mi mi kier sigui e mundo di fashion. Mi ta gusta wak fashion shows y trends di e mundo aki. Maske mi ta pensa hopi riba instructor di baile tambe. Dus mi ta kere lo ta den e richting aki sigur.

Kiko bo gusta mas di bo mes?

Mi gusta cu mi ta mi mes at all times, mi ta expresa mi mes den mi manera di bisti, mi cabey y tambe accesorio. Sin echt worry pa “fit in” pero echt focus pa feel myself.

Kiko bo ta hasi ora bo ta sinti tristo?

Mi ta purba di refleciona riba loke ta hasimi tristo, pone muziek y cuminsa baila of hasta dress up y esaki ta make me feel better.

Ken ta bo miho amiga of amigo y dicon?

Mi mihor amiga ta mi prima cu di chikito nos a lanta manera ruman y tambe Kiana ya cu nos ta share hopi cosnan parecido na otro.

Kiko ta bo mensahe pa e muchanan di Aruba? 

Sigui bo passion, hasi bo best na scol y ta open pa siña cosnan nobo. Den tur cos tin un banda negativo, pero make sure pa focus riba esun positivo semper.