Awe tardi na oficina di Unoca na Stadionweg pa 7’or e artista local Nelson Gonzalez, kende ta enfoca riba e tema di integracion di comunidad di inmigrante den nan pais di adopcion, lo bay presenta un charla detayando su investigacion artistico recien, titula ‘Between Two Waters’: un exploracion di varios comunidad den varios pais, cual ta refleha bek na ‘inburgering’ den e contexto di Caribe Hulandes.

Nelson Gonzalez, naci na Venezuela, 1979, ta un artista residencia na Aruba for di aña 2003 y trahando den Caribe Hulandes for di 1999. Formalmente e tin su studio di arte na Balashi y e ta e fundador di Art Rock Foundation. Nelson ta e productor di e Prome Encuentro Bienal Arte Contemporaneo di Caribe, Aruba y tambe director y productor di serie documental San Nicolas TV. E ta un artista multidisciplinario cu pa e ultimo 10 añanan ta representando Aruba internacionalmente den diferente proyectonan manera exposicion, residencia, bienal y investigacionnan artistico.

For di aña 2009 e ta trahando cu e tema di “inburgering” como arte y esey tin di haber cu su integracion den Caribe Hulandes como inmigrante Venezolano. Durante di su desaroyo artistico el a haci un trans disciplinacion di su trabou pasando door di e diferente tecnica, topiconan of diferente formanan di mediacion comunitario via arte. Cu esaki por confirma cu Gonzalez ta un artista multi diciplinario cu ta traha cu diferente media nan di arte contemporaneo y tambe ta haci uzo di mediacion solucion di conflicto of temanan di integracion social como base fundamental di su trabou.

Actualmente Gonzalez ta den proceso di post produccion di un investigacion artistico cu a tuma luga entre 3 continente, motibo pakico el a yam’e “Between Two Waters’. Entre 2 awa, pasobra e tin di haber cu e sensacion di otro edad, di otro banda, entre un inmigrante su cultura y un cultura nobo. Asina ey Nelson cu su metodologia di trabou di integracion di arte a biaha pa diferente continente y experimenta y pone den ehercicio un forma metodologico di produccion di arte contemporaneo cu a wordo titula “inburgering” como arte y arte como integracion y su structura, su weso di lomba filosofico conceptual ta inspira den e traduccion di e tratamento legislativo Hulandes di migracion y aceptacion di stranheronan traduci den arte contemporaneo. Den otro palabra, loke Nelson ta haci ta basicamente biaha y haci un “inburgering” local den diferente continente y traha arte nobo basa riba esey. E ta un “exploratory trip & research” cu a cuminsa na Caracas, na Corsou, Republica Dominicana, Sur Korea y Miami. Basicamente e por a realisa diferente forma di investigacion entre nan.

Su presentacion “Between Two Waters” lo ta den forma di lectura. E lo papia di e desaroyo y e experiencia den e 3 investigacion nan na Republica Dominicana, Sur Korea y Miami y e lo mustra documentacion di cada proceso di investigacion di e produccion di e obranan, resultadonan final den cada pais y tambe e lo papia di e formalisacion di un metodologia di trabou di arte contemporaneo. Manera a pone anteriormente, “inburgering” como arte, arte como “inburgering”. Y como exposicion e lo mustra e video-art cu ela realisa na Sur Korea, Miami y e parti di e produccion artistico cu el a desaroya den tur e biahenan exploratorio caminda e por a realisa su investigacion.

Unoca sigur ta hopi orguyoso di ta sostene un artista manera Nelson y ta invita tur esunnan interesa pa bin scucha y mira kico tur e lo tin di presenta cu “Between Two Waters”. Esaki lo tuma luga na UNOCA mes, diabierna 9 di augustus pa 7:00pm.

 

LEAVE A REPLY

Please enter your comment!
Please enter your name here