(NLTimes) – Comision Europeo ta propone pa limita uso di rednan social pa mucha y hoben entre 13 y 15 aña na un ora pa dia, como parti di plannan pa restringi nan acceso na e plataformanan. E limite di un ora lo conta tambe pa muchanan bao di 13 aña, aunke Comision Europeo kier prohibi nan completamente di uza rednan social. Gabinete Hulandes ya a expresa su sosten pa un prohibicion di rednan social pa muchanan.
Presidente di Comision Europeo, Ursula von der Leyen, y comisario Henna Virkkunen a presenta e plannan na Strasbourg diahuebs, durante presentacion di Kids Act. Von der Leyen ya a anuncia e limitenan di edad proponi pa rednan social durante su discurso anual tocante Estado di Union. Durante su presentacion di diahuebs, e Comision a duna mas detaye tocante e plannan.
Bao di e proposicion, muchanan bao di 13 aña no lo por uza rednan social. Sinembargo, nan lo por tin acceso na plataformanan di video specialmente diseña pa mucha, por medio di cuenta controla pa un mayor of guia.
Hobennan entre 13 y 15 aña lo por uza cuenta limita cu un mayor of guia a crea pa nan. E cuentanan aki lo tin diferente medida di proteccion, incluyendo restriccion riba interaccion social. For di 15 aña, hobennan lo por crea nan propio cuenta riba rednan social.
E legislacion tambe lo introduci exigencianan nobo pa servicionan online cu ta ofrece rednan social, weganan di video online y chatbot na personanan bao di 18 aña. Plataformanan no lo por uza funcionnan diseña pa stimula uso adictivo, manera contenido cu ta sigui aparece sin fin ora usuario ta baha riba pantaya, sistemanan basa riba recompensa y notificacionnan manda durante anochi.
Perfilnan di usuarionan bao di 18 aña lo ser poni automaticamente manera priva. Ademas, funcion pa sigui localidad di usuario y acceso na camara y microfon di aparato lo ser desactiva.
Comision Europeo lo por tuma medida contra proveedornan cu no cumpli cu e reglanan.
E proposicion ainda mester ser aproba pa e estadonan miembro di Union Europeo y Parlamento Europeo.
