Artistanan local ta boga pa bin mas dialogo riba con pa yuda Venezolanonan

Durante nos entrevista cu e 4 artistanan Arubano cu a participa cu e obra conhunto di Mare Nostrum na Museo de Arte Contemporaneo del Zulia (Maczul) Elvis Lopez a splica cu e mes como artista contemporaneo ta enfoca riba cosnan cu ta pasando actualmente. E artista ta splica cu e ta enfoca riba ta un critico social di loke ta pasando rond di dje.

Sr. Lopez, hunto cu e 3 otro artistanan Arubano Glenda Heyliger, Osaira Muyale y Ryan Oduber a traha hunto riba un obra cu ta enfoca riba e lasonan estrecho durante historia cu tabata existi entre paisnan Venezuela, Aruba y Hulanda. Manera nos a yega di reporta den siman anterior, tin artista cu a uza temanan manera contrabanda y foreign aid como tema di nan obra.

Hipocresia den maneho di migracion y deportacion

E artista, kende tambe ta director di Academia di Bellas Artes Ateliers ‘89, enbes a dicidi di enfoca mas tanto riba e aspecto di migracion cu ta bin dilanti awo cu nos pais bisiña a drenta un crisis economico y humanitario. “Mi kier a mustra kico ta e situacion actual tanto na Venezuela como na e Aruba, mirando cu te hasta kinan bo ta haya hopi hende cu kier scapa via botonan y ta muri na caminda pa yega”.

Pa añanan largo sr. Lopez ta conta nos cu e ta wardando tur e potretnan cu ta sali den corantnan local ora cu personanan cu ta bin cu intencion pa busca un miho porvenir wordo deporta, den cierto casonan despues di wordo haya den awanan teritorial. E personanan cu wordo deporta segun e artista ta wordo trata di manera hipocrita pasobra ‘den nan paspoort bo ta stempel cu semper nan ta Bon Bini na Aruba mientras cu bo ta deporta nan’.

Esaki ta algo cu no ta cuadra, segun e artista, specialmente pasobra pa 10 aña largo nan no ta haya oportunidad di drenta Aruba bek, cual ta mustra e condicion hipocrita di e stempel den paspoort.

E famianan di e personanan aki nunca mas ta tende di nan. Esey ta hacimi hopi dolor pasobra den cierto casonan nan ta hoga den lama’. E actitud di nobody cares ta loke e artista kier comenta riba dje cu su obra, mirando cu hopi biaha polis ta haya curpa pero mucho cos no por wordo haci menos haci un yamada cu un potret na publico, cual segun e artista ta un di maneranan cu ‘cosnan cruel ta pasa aki na Aruba’.

Den un entrevista cu Guillfred Besaril, e politico y actual presidente di Parlamento a declara na e matutino aki cu e ta haya como persona di descendencia Venezolano cu ‘mester bin na un trato mas humano pa Venezolanonan cu wordo haya na lama’. E politico a subraya cu e ta haya cu mester bin mas esfuerso pa saca e personanan di lama y manda nan nan pais bek.

Riba e punto aki nos a papia cu e artistanan, cual no ta di acuerdo cu un maneho simpel. Sr. Oduber en particular a comenta cu ta pone e Venezolanonan den un situacion cu ta bay di ‘bad to worse’. Esaki pasobra segun sr. Oduber e regimen na Venezuela lo por wak un persona deporta como un traidor.

Sra. Muyale a duna un ehempel cu na Hulanda hopi Venezolano ta wordo yuda y ta haya auxilio. El a remarca cu lo ta dificil pa laga e Venezolanonan keda na nos isla pero mester por yuda nan di algun manera pa ora nan bay bek nan ta miho.

Segun sr. Lopez mester bin mas dialogo entre paisnan Aruba y Hulanda pa wak ki tipo di colaboracion lo por tin entre e dos paisnan pa mehora situacion humanitario di Venezuela. “Bo nunca sa. Por ta cu Hulanda si tin espacio pa nan. Nos tur a gosa di e placa cu turistanan Venezolano a trece pa nos pero awo cu pobresa a dal nan duro bo ni ta duna nan chens, menos pa drenta.” Sra. Muyale alabes a remarca cu mester cuminsa e iniciativanan aki conhuntamente cu Consulado di Venezuela.

P’esey e artista a dicidi di traha un muraya como un di su obranan artistico pa e exposicion aki. “Tur caminda na mundo nan ta trahando muraya y nan kier cera frontera di paisnan awendia.” Riba e muraya aki sr. Lopez a pone e potretnan di personanan deporta cu el a colecta durante añanan.

Garoshi di supermercado yen di nubia

Otro obranan cu e artista a traha riba dje ta un obra consistiendo di garoshinan di supermercado cu nubia den dje y tambe nubianan cu a wordo cubri cu verband blanco pa asina ‘reemplasa e nubianan y trata di cura tur e cosnan cu ta asina mahos’ ora personanan wordo trata inhumanamente.

E obra cu e nubianan den garoshi di supermercado ta trata cu e situacion actual na Venezuela cu hende no tin placa suficiente pa haci compras na supermercado. Pero e situacion ta mas ridiculo cu esaki, pasobra e artista ta splica cu tampoco tin co’i cumpra. Tin un dicho cu sr. Lopez ta conta nos di dje, cual ta ora bo bay supermercado: te vas a comprar nubes. “E nubianan aki ta mane un soño, pero tambe por nifica nos conexion cu henter mundo pasobra esey ta conecta nos tur: nubianan.”

Tambe e obra tin di haber cu e deramenan cu nos por mira ta tumando luga recien, cu ni un par di siman atras un cu a bin di Maracay. Riba esaki e artista a comenta cu ‘e derame lo bin cerca nos y atrobe nos no lo ta prepara p’e, pio ainda ora no tin un minister pa duna orden’

Algo otro cu e artista a comenta riba dje ta cu el a nota cu e ciudad unda e artistanan a keda tabata hopi sushi. Riba esaki e artista mester a reconoce cu riba Aruba tin un infrastructura incomparabel cu paisnan den region. “Nos por critica cu no tin un museo di arte contemporaneo of pa loke sea, pero un cos si ta cu nos infrastructura compara cu otro paisnan den region Caribense ta mucho mas miho.”

You May Also Like

11Jun, JO, Yellow.jpg

Fiscal ta exigi 18 aña castigo contra ‘Yellow’

Aki 3 siman lo haya sa e sentencia den caso di Yellow. Diabierna mainta corte ...

‘Ora tin emocion halto y tension den comunidad ta importante pa refleha un momento’

Awe dia 21 di september e Organisacion Cultural, Educacional y Cientifico di Nacionnan Uni ...

Tur partido a confirma participacion debate pa comunidad Latino y otro inmigrante

Dia 24 di augustus proximo fundacion Dominicana Arubaanse Juan Pablo Duarte ta organisa su ...

AZV lo tin director nobo

Minister Dangui Oduber (MEP) a anuncia cu pa otro siman lo nombra un director ...

Rampenbureau ta confirma investigacion pa determina origen azeta

Buro Prevencion di Desaster a confirma cu un investigacion mester saca afo di si ...

11Taxi pirata.jpg

Evaluando castigo pasahero: Control taxi pirata: 90% chauffeur di exterior

Lo evalua pa castiga esunnan cu ta haci uzo di transporte ilegal. Ora cu ...