Sector di turismo na Aruba a registra otro expansion fuerte den di dos kwartaal di 2026, cu e cantidad di bishitante stay-over aumentando cu 13 porciento compara cu e mesun periodo un aña prome. E cifranan mas recien di Banco Central di Aruba (CBA) ta mustra cu e isla a ricibi 418.158 bishitante stay-over durante e kwartaal, compara cu 369.935 den di dos kwartaal di 2025.

E aumento tabata compaña pa un aumento den e cantidad di anochi cu bishitantenan a pasa na e isla. E cantidad total di anochi pa bishitante a alcansa 2,67 miyon durante di dos kwartaal, compara cu 2,34 miyon e aña prome, representando crecemento di 14,1 porciento.

E cifranan aki, publica den Quarterly Tables – Real Sector 2026-II di Banco Central di Aruba, ta punta riba momentum continuo den un di e pilarnan mas importante di economia di Aruba. Nan tambe ta revela diferencia significante entre e mercadonan principal di turismo, cu crecemento particularmente fuerte biniendo di Latino America.

Mas bishitante y mas anochi

E aumento di 13 porciento den yegada stay-over ta representa un aceleracion compara cu e di dos kwartaal di 2025, tempo cu cantidad di bishitante a aumenta cu apenas 4,2 porciento YOY (year-on-year).

Crecemento di anochi di bishitante tabatin un aceleracion mas skerpi. Den di dos kwartaal di 2025, cantidad total di anochi pa bishitante tabata apenas 1,4 porciento mas halto cu un aña prome. Pa di dos kwartaal di 2026, e aumento anual a alcansa 14,1 porciento.

Esaki ta nifica cu Aruba no a djis ricibi mas turista, sino e cantidad total di tempo cu e turistanan a pasa riba e isla a expande un tiki mas lihe cu e cantidad di bishitante.

E estadia averahe, sinembargo, a keda relativamente stabiel. Bishitantenan a keda un averahe di 6,4 anochi durante e di dos kwartaal di 2026, compara cu 6,3 anochi durante e kwartaal corespondiente na 2025.

E di dos kwartaal tradicionalmente ta registra un estadia mas cortico cu e prome kwartaal. Durante e prome tres luna di 2026, bishitantenan a keda un averahe di 7,2 anochi, mientras e isla a ricibi 427.343 turista stay-over.

Combina, e prome dos kwartaal a trece aproximadamente 845.500 bishitante stay-over na Aruba.

E cifranan cumulativo di CBA ta mustra cu yegada stay-over durante prome mita di 2026 tabata 10,9 porciento mas halto cu durante e prome mita di 2025. Total di anochi pa bishitante a aumenta cu 11,2 porciento durante e mesun periodo.

Merca ta keda e mercado dominante

Nort America ta keda manda e cantidad mas grandi di bishitante, pa un margen grandi.

Un total di 313.664 bishitante di Nort America a yega Aruba durante e di dos kwartaal, un aumento di 7,9 porciento compara cu 290.681 durante e mesun kwartaal di 2025.

Merca riba su mes a conta pa 297.039 bishitante, compara cu 277.356 un aña prome. Esaki ta representa un crecemento anual di 7.1 porciento.

E escala di mercado Mericano ta keda asombroso. Bishitantenan Mericano a representa mas di siete di cada dies turista stay-over cu a yega Aruba durante e kwartaal. E cifranan ta mustra cu hasta mientras Aruba ta atrae crecemento mas fuerte for di otro region, Merca ta keda forma e fundeshi di industria di turismo stay-over.

Sinembargo, crecemento for di Nort America tabata considerablemente mas slow cu e aumento general di turismo. E aumento di 7,9 den yegada for di Nort America tabata bao di e aumento di 13 porciento total di bishitante stay-over. Por splica e diferencia door di e expansion rapido di otro mercado.

Latino America ta impulsa crecemento

Latino America a registra e aumento mas grandi entre e regionnan principal di turismo na Aruba. Den di dos kwartaal di 2026, a ricibi78.283 bishitante for di Latino America, compara cu 53.666 durante e kwartaal corespondiente na 2025. Esaki ta representa un aumento di 45,9 porciento den apenas un aña.

E expansion aki ta continua un patronchi ya visible den kwartaalnan anterior. Cantidad di turista yegando for di Latino America a aumenta cu 21 porciento den di dos kwartaal di 2025, sigui pa crecemento di 34,5 porciento den e di tres kwartaal, y 31,4 porciento den e di dos kwartaal. Crecemento a acelera mas, na 40,5 porciento durante prome kwartaal di 2026, prome cu alcansa 45,9 porciento den e di dos kwartaal.

Como resultado, Latino America a bira un contribuidor cada bes mas importante na crecemento di turismo na Aruba.

Durante prome seis luna di 2026, cantidad di turista yegando for di e region tabata 43,3 porciento mas halto cu durante e mesun periodo na 2025. Esaki ta particularmente notorio pasobra no por atribui e aumento na Venezuela, historicamente un di e mercadonan regional importante pa turismo di Aruba.

E aumento fuerte den turismo Latino Americano, consecuentemente, a bin di otro paisnan den e region.

Europa creciendo mas poco poco

Europa tambe a registra crecemento, maske na un velocidad hopi mas modesto.

Cantidad di turista yegando for di Europa a aumenta di 15.942 den e di dos kwartaal di 2025, na 16.378 den e di dos kwartaal di 2026, un aumento di 2,7 porciento.

Hulanda tabatin un prestacion mas fuerte cu mercado Europeo den su totalidad. Cantidad di turista yegando for di Hulanda a aumenta di 8.659 pa 9.262, representando crecemento di 7 porciento.

Mira den e prome mita di aña, turismo for di Europa ta mustra un panorama un tiki mas fuerte. Cantidad di turista yegando for di Europa tabata 8,2 porciento mas halto durante prome seis luna di 2026 compara cu e periodo corespondiente di 2025, mientras e cantidad di turista yegando for di Hulanda a aumenta cu 8,7 porciento.

Sinembargo, Europa ta keda considerablemente mas chikito cu e mercadonan tanto Nort Americano como Latino Americano.

Aruba birando mas diversifica?

E expansion rapido di turismo Latino Americano ta lanta un pregunta importante tocante composicion di economia di bishitante na Aruba.

CBA ta publica un Indice di Diversificacion di Turismo cu ta midi e concentracion di mercado di turismo segun pais di origen di e bishitantenan. Un indice mas halto ta indica un concentracion mas grandi, pues menos diversificacion.

E indice tabata 0,52 den di dos kwartaal di 2026, compara cu 0,57 durante e mesun periodo di 2025.

E caida ta sugeri cu mercado di turismo a bira mas diversifica compara cu un aña prome. E desaroyo aki ta importante pasobra Merca ta keda e mercado fuente mas grandi di Aruba. Expansion continuo den Latino America y otro mercadonan por reduci gradualmente e dependencia di e isla riba un solo mercado turistico, hasta si Merca sigui domina e yegada den su totalidad.

Sinembargo, mester interpreta e patronchi pa kwartaal cautelosamente. E indice di diversificacion tabata 0,50 durante prome kwartaal di 2026 prome cu subi na 0,52 den e di dos kwartaal. Pues Aruba a keda mas diversifica cu un aña prome, pero concentracion a aumenta un tiki entre e prome y di dos kwartaal di e aña aki.

Ocupacion di hotel y turismo crucero

E crecemento den turismo stay-over a sucede banda di ocupacion relativamente stabiel di hotel.

E tasa averahe di ocupacion di hotel a alcansa 6,4 durante e di dos kwartaal di 2026, compara cu 6,3 den e kwartaal corespondiente na 2025, segun e tabel di CBA.

Turismo crucero, mientras tanto, a desaroya diferente cu turismo stay-over.

Aruba a ricibi 174.736 pasahero di crucero durante e di dos kwartaal di 2026, tiki bao di e 179.038 registra un aña prome. E cantidad di ship calls tambe a baha, di 61 den e di dos kwartaal di 2025 pa 55 den di dos kwartaal di 2026. Esaki ta contraresta cu e prome kwartaal, ora aruba a ricibi376.442 pasahero di crucero den 158 ship call.