Aruba Art Fair 2017 purbando di mehora e envolvimento di localnan despues di critica aña pasa

Aruba Art Fair 2017 cu diferente proyectonan lo purba envolvi mas artistanan local y tambe comunidad despues cu aña pasa e organisadonan a ricibi basta critica riba e dos puntonan aki. Cu e evento aki e organisadonan ta spera di pone Aruba riba mapa internacionalmente pa loke ta trata street art y otro disciplinanan artistico.

Manera nos a reporta den ultimo siman, Aruba Art Fair lo tin inscripcion habri pa artistanan local te fin di luna di oktober. Te awo tin mas cu 100 artistanan y artesanonan local y internacional registra. E evento lo tuma luga riba 24, 25 y 26 di november. E performance artists cu e organisadonan ta conta ta mas o menos 25.

Tito Bolivar, presidente di Pure Aruba Events Foundation, e organisado di e evento a splica durante un conferencia di prensa cu nan como organisado di e Art Fair ta purba duna artistanan local un plataforma pa asina nan por expone nan talentonan tanto na nivel local como regional y internacional.

Poco poco nos ta poniendo tambe un profiel hunto di cada artista y artesano cu ta participa na Aruba Art Fair pa asina publico en general por conoce e artistanan y kico nan ta haci. Pasobra e ta hopi bunita pa sa kico e personanan ta haci den nan expresion artistico”.

Sinembargo no semper e organisado di e evento aki, Pure Aruba Events Foundation, a tene consideracion cu artistanan local. Despues di Aruba Art Fair 2016 tabatin artistanan local cu a expresa nan malcontento cu e organisacion. Specificamente pasobra tabata duna mas recurso na artistanan internacional cu artista local. Un di e criticanan cu a drenta tabata cu e muralistanan internacional a wordo paga pa haci e trabou, mientras artistanan local no a haya ningun compensacion.

Sr. Bolivar ta desmenti cu esaki a tuma luga. “Nos no ta paga ningun artista. Si loke nos ta percura p’e ta pa e muralistanan local haya e material cu nan mester, hunto cu algo di bebe y come. Pa loke ta trata muralista internacional nos ta percura pa nan haya un luga di keda, por ehempel cu nos partner Divi Hotel. Pero artista cu ta participa cu e feria di arte no ta haya nada, mirando cu nos no ta cobra pa nan participa ni pa nan espacio”.

Desde e tempo ey e organisadonan ta purbando di integra e artistanan local mas. Segun sr. Bolivar, e aña aki tur e performance artists ta artistanan local. E 100 artista y artesanonan cu a wordo menciona ta consisti di 25 di origen internacional, mientras e resto ta di origen local. Di e 100 artista y artesanonan cu a inscribi, 80 a wordo selecta pa e team di curatornan. E biaha aki tambe ta consisti di personanan local: Eduardo Valbuena y Chico di Curators to go.

Riba aspecto comunitario tambe e aña anterior di Aruba Art Fair a ricibi su critica, mirando cu personanan den comunidad no a wordo envolvi mucho den e proceso ni a percura pa informa nan kico ta wordo organisa. Esaki sr. Bolivar a admiti di faya den dje e aña pasa, ‘pero nos ta trahando pa mehora esaki e aña aki’.

Nos lo bay den barionan y percura pa nos parti mas carchi gratis pa esnan den comunidad tambe por presencia e feria”.

Riba e mesun aspecto comunitario, un competencia culinario a wordo organisa cu lo a envolvi EPB den e proceso tambe pa Aruba Art Fair 2017. Pero esaki a wordo cancela. Segun sr. Bolivar, esaki a bin pa via di e ambiente politico cu tabatin.

Nos tabatin un schedule pa ehecuta e proyecto, esta cu e mester a tuma luga fin di oktober. Pero e ambiente politico pisa a haci cu nos stakeholders a enfoca hopi riba kico e resultado di eleccion lo a ta. EPB cu tur su derecho a rabia cu nos pasobra nos no tabata trahando segun e schedule. Pues p’esey awo e feria lo tuma luga fin di november, ora e ambiente politico lo ta mas trankil. EPB lo sigui participa cu e 4 canvasnan di Art Expression”.

Mescos cu aña pasa, Aruba Art Fair lo trece diferente muralista internacional, cual e aña aki lo ta un cantidad total di 10 artista. Asina cu e proyecto sigui crece, segun sr. Bolivar, mas artista ta bin serca nan pa wordo inscribi. Riba esaki sr. Bolivar a elabora cu ‘normalmente nos organisacion ta bay busca artistanan pa pidi nan participa. E biaha aki nos por mira un cambio cu artistanan ta bin serca nos’.

Esaki segun e organisado di e feria lo pone Aruba riba mapa pa loke ta trata street art.

You May Also Like

Bo ta pro pa haci sucu mas caro?

Investigacion cientifico durante varios decada ta comproba cu e uzo excesivo di sucu ta ...

Marihuana no ta bon pa hoben menor di 25 aña

ORANJESTAD – Diabierna mainta den un conferencia di prensa, diferente instancia y profesional a ...

5P3A6973.JPG

Polisnan den accion buscando sospechoso relaciona cu casonan di menasa

Dialuna mainta por a tuma nota di Polisnan di K9 Unit, Polis di Bario di ...

casino-at-the-hyatt-regency-755x380.jpg

Tres sospechoso di atraco riba casino a haya 5 aña di prizon

E caso di e atraco riba Excelsior Casino, no a bay sin cu a ...

25aug (NP) entrevista.jpg

Regulacion All inclusive no kiermen cu ta stop All inclusive

Minister encarga cu Turismo Otmar Oduber ta satisfecho cu a pasa e ley di ...