Aruba Birdlife Conservation a presenta na formador di gobierno señora Evelyn Wever-Croes, un lista di articulonan, preocupacionnan y tambe recomendacionnan pa e conservacion di naturalesa y medio ambiente di Aruba.

Den e documento Aruba Birdlife Conservation ta subraya primeramente integridad. Reglanan y principionan nacional di bon gobernacion pa locual ta trata Aruba su naturalesa y medio ambiente. Nan kier transparencia completo di intencionnan y documentonan pa locual trata proyectonan cu ta planea of cu ta den e liña di informacion di administracion, y tambe pa e finanzas publico limpi wordo usa solamente pa bienestar comun solamente.

E puntonan mas significante cu a keda determina durante e evaluacion di riesgo nacional di Aruba ta number uno, politiconan corupto, number 2 proyectonan di real estate. E departamentonan di infrastructura ta e organisacionnan number uno caminda tur dos di e puntonan aki ta bini hunto. D.I.P., D.O.W. y Kadaster mester wordo poni bou di curatela, mester wordo haci limpi y wordo reorganisa. Aruba Birdlife Conservation a hiba dilanti mas di 20 caso den corte contra corupcion y mayoria di nan tabata relacion cu infrastructura.

E documento menciona un kibramento serio di integridad ora cu intencionalmente no ta publica rapportnan y consehonan importante. Consehonan di diferente departamentonan y organisacionnan ta ser warda secreto for di e publico. E practica aki mester wordo considera como un ofensa criminal Haciendo esaki, e pueblo di Aruba ta wordo mal guia intencionalmente y no ta sirbi e bienestar general.

Segun e documento e gobierno mester desaroya un Codigo di Conducta di Naturalesa. Tur interesado importante, institucionnan, compania mester wordo obliga pa tene nan mes na e codigo di conducta aki. Organisacionnan cu mester atene na e codigo ta por ehempel, Banco Central di Aruba, tur banco na Aruba, incluyendo Aruba Investments Bank, tur compania di propiedad estatal y tur departamento di gobierno.

Specificacion mas cla di e codigo aki ta cu mester introduci derecho di naturalesa, mester fortalece regulacion pa medio, mester introduci un autoridad cu tin e libertad pa regula y aplica e codigo, y e Natuur Bescherming Verordening mester wordo actualisa. E departamento di naturalesa y medio ambiente tambe mester wordo reorganisa. E departamento mester enfoca solamente ariba problemanan di medio ambiente.

E documento tambe ta señala cu e turismo aventurero mester wordo elimina. E cantidad di ATV/UTV/Jet Ski mester wordo elimina. ATA no mester promove e tipo di turismo aki. E operadornan di e vehiculonan aki mester wordo incentiva pa cambia pa vehiculonan electrico y tambe mester determina e areanan y localidad nan caminda e UTV nan ta permiti y vehiculonan mester tin GPS cu ta mustra e areanan di restriccion.

Ta wordo menciona den e documento tambe cu un serie di campañanan di conscientisacion mester wordo desaroya y implementa pa turistanan y lokaalnan tambe, como por ehempel cu ta prohibi pa pone piedranan riba otro y tambe contra kitamento di material di fondo, piedranan natural, cocolishi, coral etc. y di acuerdo cu e NBV (Natuur Bescherming Verordening) no mag di mata of lastima ningun animal nativo.

E documento ta papia tambe di expansion pa nos parke marino pa inclui otro areanan ecologicamente fragil, incluyendo e supervision di e areanan y regeneracion di zona nan marino. Y tambe ta pidi pa incorpora educacion ambiental den e sistema di educacion primario y secundario.

Ta recomenda pa introduci economia circular, energia reusabel, y desaroyo di un politica di ‘zero-waste’, incluyendo un prohibicion pa importacion ariba tur tipo di plastic y otro productonan no reciclable of di un solo uso.

Aunke e lista entrega na formador di gobierno di parti di Aruba Birdlife Conservation ta uno bastante extenso, pero e no ta completo mirando tempo cu nan a ricibi pa prepara pa e reunion cu e formador di gobierno.

LEAVE A REPLY

Please enter your comment!
Please enter your name here