DEN HAAG – Den futuro, habitantenan di Aruba, Curaçao y St. Maarten lo por vota pa Eerste Kamer, si nan tin por lo menos 10 aña cu nan a biba den teritorio di Hulanda Europeo.
Esaki lo ta resultado di e decision di actual gabinete Rutte pa facilita pa ciudadanonan Hulandes cu ta residencia den exterior pa nan por vota pa Eerste Kamer (Senado). Esaki no ta posibel awor pasobra e composicion di Eerste Kamer ta keda estableci a traves di e resultado di eleccion pa ‘Provinciale Staten’ na cual actualmente solamente esnan residencia den e corespondiente provincia, cu nacionalidad Hulandes, por vota.
Minister encarga cu asunto interior, Kajsa Ollongren a informa Tweede Kamer cu e ta prefera di crea e formacion di un kiescollege separa pa cual Hulandesnan den exterior por vota. E resultado di esey ta conta den e resultado pa Eerste Kamer.
Cu esey ta sigui e solucion cu e gabinete anterior a scoge pa e habitantenan cu nacionalidad Hulandes riba e islanan di Reino den Caribe, cu ta teritorio Hulandes directamente. Dia 20 di maart nan lo por vota pa un kiescollege apart cu ta conta pa Senado. E habitantenan di e otro tres islanan Aruba, Curaçao y St. Maarten lo mester warda algun tempo, ya cu mester haci un cambio den constitucion Hulandes pa gaci esaki posibel.
