Aruba Excellence Foundation (A.E.F.) ta orguyoso cu mas organisacion ta logra di certifica full nan team cu e status di 100% ‘Aruba Certified’ por medio di e programa di certificacion di Aruba, miho conoci como A.C.P.

Aña pasa S.K.O.A. a firma un MoU cu A.E.F. cu e meta pa tur scol di S.K.O.A. participa cu Aruba Certification Program (A.C.P.). E buita resultado ta cu 29 scol, a logra e status di 100% ‘Aruba Certified’ e aña aki. Pa yega na e gran logro aki, cada miembro di team di scol a participa y a completa e programa di certificacion di Aruba A.C.P.

E siguiente paso ta cu A.E.F. lo capacita e docentenan pa incorpora informacion corecto di Aruba, usando e materiaal di Aruba Certification Program den nan les por ehempel den e vak ‘Wereld oriëntatie’. Tambe lo percura pa semper tin conneccion cu – y traha segun e ‘kerndoelen en eindtermen’ stipula pa Directie Onderwijs y Inspectie. A.E.F. por haci esaki danki na e colaboracion cu tin cu I.P.A. caminda cu e trainers di A.C.P. ta wordo capacita segun e stipulacionnan aki como tambe e 21st Century Teaching Skills. Di e forma aki, nos muchanan na scol lo haya sa mas tocante Aruba su historia, cultura y tradicionnan, desaroyo di nos industrianan, servicio excelente y cordial cu Aruba su zjeito, y e importancia di Turismo pa Aruba.

Staff y directiva di S.K.O.A. mes tambe a logra certifica full nan team.

Pa celebra e ocacion aki a invita staff y directiva di S.K.O.A. como tambe tur e cabesantenan pa un award ceremony na Taste my Aruba.

Aki Directora di Aruba Excellence Foundation a duna un palabra di pabien y danki pa e gran compromiso y logro aki.

Den transcurso di siman binidero lo instala e plakaat di reconocemento na tur 29 scol.

Un danki ta bai pa Directora di S.K.O.A. Sra. Anuesca Baly y Sra. Cavril Martijn y full e team pa tur empeño y tambe cada cabesante di scol cu a percura pa e team completo di nan scol participa cu Aruba Certification Program.

Pabien na S.K.O.A. y pabien na e siguiente scolnan:

Agnes Kleuterschool, Anglo Kleuterschool, Colegio Bon Bini, Colegi Cristo Rey, Colegio Felipe B. Tromp, Colegio Frere Bonifacius, Colegio Laura, Wernet – Paskel, Colegio Ora Ubao, Colegio Santa Filomena,

Imelda Kleuterschool, Jacinta Kleuterschool, La Salle College, Maria College Mavo, Rosario College, Sint Michaël School, St. Paulus School, St. Dominicus College, St. Franciscus College, Tarcisius Kleuterschool, Sint Aloysius School, Sint Annaschool, St. Jan Kleuterschool, Scol Preparatorio Kukwisa, Ayo Kleuterschool, Colegio Pastoor Kranwinkel, Colegio Santa Famia, Colegio Santa Teresita y Trupial Kleuterschool.

Desde aña 2017 a cuminsa otorga e A.C.P. Recognition Award na compania of organisacion cu full e team ta certifica, sea cu nan tin contacto directo of indirecto cu turista. Meta ta pa tur persona comparti informacion corecto y uniforma di Aruba.

Aruba Excellence Foundation a wordo institui door di Aruba Tourism Authority na juni 2018 y ta e fundacion encarga pa entre otro ehecuta e Aruba Certification Program (A.C.P.) como tambe e programa di Happy Information Officers (H.I.O.). Meta principal di e fundacion ta pa sigui desaroya y implementa A.C.P. y H.I.O. como tambe otro programanan specialmente diseña pa certifica personanan cu ta traha den sector di servicio y hospitalidad, p’asina percura cu e nivel di servicio excelente di Aruba ya bon conoci, por keda riba un nivel halto.