Diahuebs ultimo a tuma luga e apertura pa e Aruba Internacional Cup Rhythmic Gymnastics Competition organisa pa e club di deporte local Perla Gymnastics Aruba. Durante dos dia di competencia clubnan di diferente paisnan a participa den e varios categoria- y nivelnan di e deporte di rhythmic gymnastics.

Adriana Sevilla, coach y un di e fundadornan di Perla Gymnastcis Aruba ta conta Bon Dia Aruba cu e evento den su totalidad a bay hopi bon. “E evento tabata hopi bunita. Nos tabatin algun problema tecnico manera retraso pa motibo cu algun entidadnan no tabatin nan forumlarionan na ordo. Pero tur cos a bay bon ningun mucha a sali lesiona, tur mucha a keda contento y tur tin medaya”.

E competencia a conta cu seis pais en total cu a participa. Sevilla a splica cu na principio shete pais a registra pa participa, pero lamentablemente Ecuador no a logra asisti na e competencia pa motibo di problema cu paspoort- y formularionan.

Sevilla a sigui splica cu e preparacion, no solamente di e atletanan pero di e organisacion pa e competencia aki, a cuminsa desde e principio di aña. Den luna di maart Perla Gymnastics a muda pa nan localidad nobo caminda pa prime biaha e muchanan por a train ariba un tapijt di competencia di gymnastics locual, segun Sevilla ta conta, ta haci cu e muchanan ta mas sigur di nan mes.

“Nan ta mehora pasobra nan ta conoce e espacio. Nos a dura basta luna tambe ta train den gym mes pa prepara nan curpa fisicamente y e ultimo tres simannan nos a train seis dia pa siman pa tres ora cada dia. E preparacion tabata bastante fuerte pa yega na e meta cual tabata participa den e competencia y haci un bon papel pa e club y pa Aruba”, el a bisa.

Pa loke ta otro aña Sevilla ta conta cu tin varios competencia interncaional di rhythmic gymnastics na entre otro Mexico, Merca, Paraguay y Venezuela cu Perla Gymnastics ta invita pa participa. “E siguiente stap lo ta sinta papia cu e mayornan pasobra nan ta e support principal di tur esaki. Ami ta duna nan e ideanan, mi ta prepara e muchanan, pero den e parti economico nan ta esunnan cu ta respalda nan yiunan”.

Minister di Enseñansa y Deporte, Endy Croes, tabata presente na e apertura oficial di e Aruba Internacional Cup Rhythmic Gymnastics Competition. Croes a comenta na Bon Dia Aruba cu como Minister di Deporte e ta brinda su apoyo na deporte den su totalidad. “Ora cu nos mira e muchanan cara alegre con nan ta gosa y disfruta den nan deporte ta yena nos cu hopi alegria”, el a bisa.

El a remarca cu pa loke ta e parti di apoyo financiero esey ta cay bao di Lotto pa Deporte y Stichting Subsidie Aruba cu ta duna e apoyo financiero, pero como Minister di Deporte e ta contento cu deporte ta resaltando internacionalmente. “Y e deporte aki tambe y nos apoyo nan por conta cune”, el a finalisa.

Perla Gymnastics representando Aruba a logra diferente medaya den e varios categoria- y nivelnan durante e competencia. Coach Sevilla ta expresa cu e ta mas cu contento cu e participacion di su atletanan y ta spera cu proximo aña por tin hopi mas atleta ta participa den e Aruba Internacional Cup Rhythmic Gymnastics Competition.

Bon Dia Aruba a combersa tambe cu algun di e coachnan di e diferente paisnan. Coach di Republica Dominicana, Mariam Parra, a aplica cu nan proceso di preparacion tabata dificil pa motibo cu na su pais e deporte di rhythmic gymnastics no ta popular y pues ta dificil pa haya espacio adecua pa train, pero a pesar di dificultadnan ta contento cu e e trabou di su atletanan.

“Seis mucha a bin competi y mi ta hopi contento cu tur di nan a logra medaya y tambe a logra subi e podium di e top tres luganan durante e competencia. E competencia tabata hopi bon organisa y Aruba ta un isla hopi bunita y su hendenan a trata nos hopi bon na tur momento”, Parra a comenta.

Coach di Bolivia di e Club Panteras a splica cu nan a competi cu 12 atleta den total den diferente categoria- y nivelnan y e resultadonan tabata miho di loke nan a spera. “Nos muchanan a luci den tur e nivelnan y nos ta hopi contento cu e resultado tambe. Prome biaha nos ta participa den un copa den Caribe y di berdad nos ta hopi contento cu nos a bin y e muchanan a disfruta hopi di e isla”, el a bisa.

Claudia Torres Cruz, coach di Mexico di e Club di Oro di Mexico a conta cu e experiencia tabata hopi bunita pasobra e atletanan cu a bin competi ta atletanan cu aworaki ta drentando den e munod di competencianan internacional y nan disfruta hopi di henter e experiencia.

“E obhetivo principal ta pa nan disfruta y apoya otro. E muchanan ta super contento. Ta prome biaha nos ta bin Aruba y nos ta namora di e isla. Tur hende ta hopi amabel y nos a gusta con tur hende ta trata nos tur caminda”, Torres Cruz a indica.

 

LEAVE A REPLY

Please enter your comment!
Please enter your name here