Na Kulture Café a tuma luga e tan anticipa Business Plaza-Get Started! in San Nicolas! E edicion aki a crea un bon impresion bou di tur persona cu a participa. Den un sala completamente yen, e oradornan invita a brinda participantenan cu informacion di calidad cu sigur ta beneficia nan como persona y empresario.

Business Plaza-Get Started ta wordo organisa specialmente pa esunnan cu ta desea di cuminsa cu nan mesun negoshi haya mas informacion y guia riba aspectonan importante.

Como apertura di e programa, sr. Martijn Balkestein, director di Camara di Comercio a yama un y tur bonbini y a splica pakico e evento aki ta wordo organisa y ta contento cu asina tanto persona tin interes pa educa nan mes riba diferente topico relaciona cu establecimento y maneho di negoshi.

Siguientemente, Minister di Asunto Economico, Comunicacion y Desaroyo Sostenibel, sr. Geoffrey Wever a yama un y tur bonbini y a comparti su opinion y vision pa locual ta trata desaroyo di San Nicolas y e oportunidadnan pa establecimento di negoshi.

Oradornan invita tabata Chris Kross, Chamilla Williams, Rocio Burgos, Gilmar Croes y Nadine Antersijn kende a duna un presentacion tocante nan experticio. E topiconan cu a ser trata tabata experencia di un empresario, marketing, impuesto y servicio na cliente. Como MC a fungi sra. Lay Hing de Kort-Yee, miembro di directiva di KvK.

E programa completo a ser transmiti en vivo via di ‘live streaming’ cu tabata den man di Ingenuity Creative Marketing, cu a percura pa personanan cu no a logra pa atende por a sigui esaki via Facebook.

Ademas, nos a conta cu presencia di representante di organisacionnan Qredits, Departamento di Asunto Economico, Universidad di Aruba y naturalmente nos sponsor principal Guardian Group.

Na final di e presentacionnan, publico a haci bon uzo di e oportunidad y a haci varios pregunta na e oradornan. Por ultimo, un y tur a disfruta di e ambiente ameno acompaña pa snacks y bebida durante e networking session pafo na Kulture Café.

Gradicimento special ta bay na nos sponsor principal Guardian Group y tambe nos colaborador Fast Delivery Services pa haci e evento aki posibel.

Pa mas informacion tocante nos evento y cursonan y nos planning pa 2023, por tuma contacto cu nos via email: businessinfo@arubachamber.com of yama nos na: 582-1566 ext. 30/35/42.