Esnan cu por a kere cu e asunto di Aruba su finanzas publico lo a desaparece di front page di medionan, a sali mal ekiboca; ta parce cu awor e ta bay cuminsa. CAft a habri e cadena di accion cu ta bay cuminsa y cu por bira bastante largo. Nan a laga sa, den un carta na e ministro concerni, cu den e circunstancianan aki, nan no ta mira un base pa bin delibera cu gobierno y eherce nan trabao di supervision. Y nan no a laga e asunto na e anuncio so, sino a trece e punto di vista cu gobierno di Aruba no ta cumpliendo cu e protocol cu nan a firma na november aña pasa.

E protocol en berdad ta bisa cu e ley no por bin na vigor tanten cu no tin un acuerdo riba esaki den Conseho di Ministro di Reino. Es decir, cu tabata contempla caba den e texto di e protocol cu parlamento di Aruba, den acuerdo o sin acuerdo cu e gabinete, por a percura pa un situacion asina, unda e cambionan den e ley no a keda limita na loke a palabra den e protocol.

Aki ta surgi caba un prome punto di divergencia entre gobierno di Aruba y gobierno Hulandes. Gobierno di Aruba a introduci e cambionan acorda den e protocol, den e sentido aki nan a cumpli, pero seguidamente a haci manera nan no sa nada kico nan fraccionnan den parlamento tabata haciendo. Esey no ta berdad, pasobra varios miembro di e fraccion tabata conta na cuanto un hende cu kier a scucha cu nan ta bay cambia e ley drasticamente, pa haci esaki di acuerdo cu nos constitucion y Statuut. Ademas henter e ruta aki a tuma varios luna, mientras e idea original tabata cu tur esaki mester tabata haci caba pa fin di 2018.

Inmediatamente a bin un reaccion di un di e protagonistanan den e cambio di ley di siman pasa, e lider di fraccion di partido MEP. Basicamente su reaccion, cu tambe ta aparece den e edicion aki, ta ripiti e opinion treci dilanti ampliamente caba. Tin un punto si unda su argumentacion ta contradictorio, y esey ta unda ta spera di CAft, un organismo lanta conhuntamente, y financia pa Hulanda, pa bay haci trabao na Aruba, y duna cuenta na parlamento di Aruba… Pero, no ta esey tabata e critica riba e ley cu Raad van Advies, y e fraccionnan concerni ta comparti? Cu bo no por regla tipo di tarea y facultad den un ley local…? No ta pornada Raad van Advies a trece den e mesun rosea dilanti cu e asuntonan aki mester keda regla den un ley di Reino (Rijkswet) o den un Algemene Maatregel van Rijksbestuur (AMvRB). Claro cu e fraccionnan ‘olimpicamente’ a lubida di lesa e parti aki di e conseho y ta supone cu e colegio di supervision lo aparece ‘bon mucha asina’ na Aruba pa haci nan trabao… Keda soña di dia. E cos aki ta bay resulta hopi diferente cu nan ta kere, y esey pa un motibo simpel: e ley tabata expresion di un acuerdo pa institui supervision di Reino riba Aruba su maneho financiero, pa garantisa cu segun un ruta acorda nos ta yega na finanzas publico sostenible. Awor, unilateralmente a corta Reino/Hulanda for di e wega, anto bo por kere cu esey ta bay keda asina?

Gobierno ta hungando e wega di “yo no fui, ta nan (parlamento) a inventa tur esaki.” Masha bunita, pero esey no ta bay yuda. Finalmente e wega cu ta hunga aki no tin nada di haci cu democracia, ni cu deficit di democracia, ni cu otro palabra bunita, pero simplemente ta trata di ehercicio di poder. Si Aruba no ta desea mas di tin e ehercicio di supervision regla den un ley local, por regla esaki na otro manera.

Awor, ora despues e asunto aki di supervision di Reino keda regla di otro forma, nos no mester di tende e yoramento y lamento cu e Hulandesnan a ‘podera di nos teritorio’ atrobe, pasobra finalmente, e no ta di nos, ta p’esey e yama ‘autonomia’. No ta e ley aki so ta un cu mester ‘bendicion’ di gobierno di Reino; e ta conta pa tur ley. Den tur caso Gobernador por ta di opinion cu un ley no a surgi for di un debido proceso y por ofrece esaki na e Rey (lesa: Conseho di Ministro di Reino) pa anula esaki. E proceso aki pa loke ta e ley aki mester cana su caminda ainda. Hulanda ta studiando su opcionnan y nos lo haya sa pronto kico lo ta e proximo paso. Pero tin un cos sigur: Aruba no tin e ultimo palabra, pasobra ta nan ta Reino, y no anos.

Nos ta bolbe ripiti loke a bisa anteriormente caba: nos no tabatin mester di tur e turbulencia aki, loke nos mester ta un gobierno cu ta actua bon y contundentemente. No un gobierno cu ta traha su propio olanan riba un dia cu no tin biento… Si di tur esaki resulta un retraso den e cantidad grandi di asunto cu mester regla den e periodo di gobernacion aki, e pregunta cu ta keda ta: pakico tur e cos aki?

 

LEAVE A REPLY

Please enter your comment!
Please enter your name here