Aruba lo keda pendiente di e situacion na Venezuela

ORANJESTAD – Dialuna mainta den un conferencia di prensa, minister president Evelyn Wever-Croes (MEP) a papia tocante e situacion di Venezuela; tambe cu Reino a reconoce Juan Gaido como president interno.

E mandatario a bisa cu e pais bisiña ta den momentonan dificil y ta siguiendo e desaroyo di cerca. El a continua bisa cu mainta nan a ricibi e informacion cu Hulanda a reconoce sr. Guaido como president interino di Venezuela, cu e peticion pa nan organisa un eleccion liber pa e pueblo di Venezuela mes por scoge nan propio president.

Segun e mandatario, parlamento Hulandes a manda e carta pa Tweede Kamer pa duna mas informacion di e posicion di Hulanda y Reino. “Na Aruba nos ta sigui situacion aki di cerca. Nos ta reuni cu autoridadnan local riba e topico aki. Diaranson den parlamento, nan a pidi mas informacion importante. Nos lo t’ey hunto cu autoridadnan local concerni. Hunto cu marina real y autoridad local na tera, den bon coordinacion cu Corsou y Bonaire, Reino henter ta prepara pa cu tema di Venezuela.”

Minister Wever-Croes a bisa cu lo informa tambe si tin desaroyonan nobo. El a continua bisa cu na Aruba no tin mucho cu por wordo haci. Locual e mandatario a bisa cu tin pa haci ta uni tur hende y haci oracion pa nada bay malo. Pa e situacion no bira un grave y pidi pa un solucion pronto.

E ta pidi pa comunidad di Aruba keda trankil, pa no cay den panico, ‘ta den trankilidad por tuma miho decision pa proteccion di pais Aruba’. El a continua splica cu lo delibera cu e tema delicado den forma ‘sensato’. E ta haci apelacion na oposicion pa asina no tin confusion y nan trece informacion cu no ta corecto.

E ta remarca cu asuntonan di Venezuela ta un conflicto interno, cu Aruba no por mete den esey. Locual por haci ta prepara pa cualkier cos, y wak e tema cu trankilidad, pa tuma e decision. “E control di costa ta miho, intensivo y ta keda prepara; esey ta locual nos ta haciendo.”

Riba un pregunta haci pa colega di prensa, minister a contesta cu e relacion diplomatico cu tin cu consul actual di Hulanda y president actual Nicolas Maduro, ta keda intacto. “E president ta esun cu ta keda cu e gezag. Aki na Aruba tambe tin confusion, pa motibo cu un ta reconoci y e otro t’ey ainda. No ta na nos pa aclara esey.”

Riba rednan social por nota cu ta pidi of bisa con ta bay wordo haci cu deportacion pa Venezuela. Un colega di prensa a puntra si esaki lo stop of sigui normal. Minister Wever – Croes a contesta. “Segun ami e maneho no a cambia, no ta mira e situacion diferente. Tin espacio pa hende pero mester ta cu base legal y obtene status legal.”

E ta agrega cu mester hende pa yuda den e area laboral, sinembargo, tin regla y procedura cu mester atende. E ta den bista si tin cambio den maneho pa locual ta ilegalidad, ta pidi minister di husticia pa mas splicacion.

Ta conseha pa hende no bay biaha bay Venezuela si no ta necesario. E ta bisa cu ta compronde cu tin cu check salud, of hende tin famia, pero no ta un momento pa biaha bay pa motibo cu no sa kico por pasa.

E mandatario a finalisa bisa pa hende no bay den panico. Si yega pasa un intervencion militar na Venezuela, e ta bisa cu Aruba ta leu di locual por sosode. “E no tin mucho efecto pa bida diario, pero e panico di kico e por trece na nos turismo, paso esey ta e pan di cada hende. Esey ta tene na cuenta. Ta nos pilar economico.”

You May Also Like

No tin niun motibo valido pa cambia klas 4 di Papiamento pa Hulandes

Drs. Merlynne Williams ta docente y investigado di idioma na IPA y ta miembro ...

Hobennan sin paspoort: con proyecto Dreamers lo yuda nos?

Dos siman pasa Bon Dia a entrevista dos hoben cu ta sinti cu nan ...

A firma acuerdo cu Niagara College di Canada

E siman aki gobierno di Aruba a yega na un acuerdo cu Niagara College, ...

image.jpeg

Hunta di Alumno di Colegio Arubano: ”Alumno mester keda e prioridad y nos bos mester wordo scucha”

Den cuadro cu diferente situacion fastioso pasando e ultimo temponan na Colegio Arubano , ...

CENSO : Cambio di proceso den casonan di perde paspoort

Den pasado den casonan di perdida di paspoort of casonan di paspoort horta, ciudadanonan ...

green corridor brug.jpg

E brug bieu di Pos Chikito lo bira area di recreacion

Awor cu e trabou di e brug nobo di Green Corridor ta birando mas ...