Decision riba dolarisacion a keda posponi pa 2022, mescos cu aumento edad di pensioen

Na 2022 lo ehecuta un investigacion riba e gasto di comunidad pa carga su propio moneda. Den otro palabra, e agenda di ehecucion di e landspakket palabra entre Hulanda y Aruba ta keda sali di e punto di bista cu mester considera pa elimina florin como medio di pago y introduci dollar. Pero riba tereno di belasting, hopi di e trabao ta den man di Aruba.

E agenda di ehecucion a keda firma dia 1 di October entre Prome Minister Evelyn Wever Croes y Secretario di Estado Raymond Knops y ta ilustra tur e trabaonan cu mester sucede te cu December 2021, pa asina cumpli cu e palabracionnan pa reformanan.

Reforma di belasting ta uno crucial y pa 15 di November Aruba mester tuma un decision riba e structura, basa riba un plan di accion pa revisa e sistema fiscal y belasting riba entrada. Meta ta pa aumenta locual Gobierno mester ricibi y haci henter e structura mas robusto. Den e plan di accion ta mira con ta amplia e base di belasting, unda ta pasa di belasting directo pa indirecto y introduccion di un VAT (Value Added Tax) of BTW di 12.5 porciento, conforme e proposicionnan di e Departamento di Asuntonan Fiscal di IMF. Pero tambe Aruba por scoge e sistema ABB cu aworaki ta den uso na Islanan BES. Ademas e plan di accion mester inclui medidanan riba reduccion substancial di gasto di belasting y contribucion y traspaso pa otro. Tambe mester limita e influencia, metemento y e autoridad discrecionario di tanto ambtenaarnan como Gobernantenan, por ehempel pa acorda cu inversionistanan ta haya asina yama ‘tax holidays.’

Comparti datonan bancario

Aruba ta encarga pa introduci cambio di e ley di belasting riba cambio di datonan automatico, pero segun e agenda di ehecucion, lo puntra actornan relevante si e fecha aki ta factibel. E ta nifica cu Servicio di Belasting mester por ricibi tur dato necesario di e sector bancario y lo tin un plan di accion pa ademas di banco, notarionan, SVB y fondo di pensioen ta conecta na e mesun sistema di comparti informacion. Pa 1 di April 2022 Aruba mester percura pa pidi un evaluacion di e plan di accion na e Organisacion pa Cooperacion Economico y Desaroyo, OECD pa por permiti comparti datonan internacional.

Pa prome di December lo mester defini si ta logra cierto obhetivonan, y dia 1 di Februari 2022, lo presenta un reportahe con leu a yega cu e trabaonan. Entre otro mester tin un plan di accion pa optimalisa y modernisa Servicio di Belasting. Esaki lo sucede a base di investigacion nobo of existente pa mira con e departamento aki lo por funciona mas efectivo y eficiente. E decisionnan lo ta basa riba recomendacionnan.

BEPS

Hulanda y Aruba lo yega na un acuerdo di belasting den liña di e condicionnan di e asina yama Minimum Base Erosion and Profit Shifting, BEPS, unda ta analisa entre otro unda ta preveni un eventual movecion di ganashinan [red. 140 pais ta coopera a base di e BEPS. Hopi compania multinacional ta probecha buraconan y e hecho cu sistemanan di belasting di diferente pais no ta acopla na otro, y asina ta nifica cu particularmente paisnan den desaroyo, manera Aruba, no ta haya e fondonan necesario. Ta paisnan cu mas mester di e entrada corporativo aki. Negoshinan ta opera na nivel internacional, cu ta implica cu gobiernonan tambe mester traha hunto pa atende cu e BEPS y asina restaura confianza den sistemanan di belasting local y internacional. Practicanan BEPS ta costa paisnan entre 100 pa 240 biyon dollar na entrada anualmente, cu ta ekivalente ta cuater a 10 porciento di e entrada di ganashi riba entrada corporativo]. E acuerdo aki lo mester ta cla pa fin di aña. Introduccion di e areglo mes lo sucede entrante 1 di Januari 2022, pendiente tratamento na ora den Conseho di Minister di Reino y Parlamento di Aruba.

Reforma Fiscal

Henter e pensamento tras di reforma fiscal di Aruba, cu ta inclui continuacion di florin of no, tin como meta pa realisa regulacion di e sector financiero na un forma adecuado, unda ta tene bon supervision riba implementacion di leynan. Tambe e reforma mester sigura cu e supervisor por actua na ora y cu determinacion ora cu tin problema den empresanan financiero. Tur cu e meta pa yega na un sector financiero stabiel cu por cumpli cu su papel pa sostene un economia real.

Mescos cu ta den e caso di belasting, hopi di e trabaonan ta den man di Aruba y algun ya a inicia, manera e Ley DGS, cu ta e Ley di Structura di Garantia pa Deposito cu mester tabata cla den concepto pa 1 di October 2021. Evaluacion ta pendiente riba e proceso parlamentario y e conseho di Raad van Advies. E Ley mester pasa pa 1 di Februari. Tur esakinan ta cambionan di leynan cu entretanto ya a cuminza pasa, entre otro pa bringa labamento di placa y combati financiamento di terorismo.

Otro ley cu mester ta cla pa 1 di December pa asina Parlamento por trat’e ta e Ley Credito di Consumidor y e institucion di un registro UBO, cu ta registra kendenan ta e doñonan final di companianan, esta e Ultimate Beneficial Owners. E registro aki mester drenta na vigor 1 di Maart 2022.

Economia resiliente

Meta di reforma economico ta realisacion di un economia cu ta resiliente, dinamico y cu por absorbe shock externo, y tambe pa yega na un structura di seguridad social fuerte y pagabel cu ta pone e estimulonan riba e luganan debido.

E maneho di mercado laboral lo keda analisa, y ta bay introduci ley y regla nobo pa modernisa esaki. Medidanan manera reduccion di cantidad di ora di trabao, trabao part-time, contract pa periodo determina, flexibilisacion di e ley di retiro, kita estorbonan pa tuma trahado di exterior den servicio, uso di trahado sin permiso y desempleo hubenil ta parti di e analisis, cu a keda posponi. E rapport final mester ta cla pa prome di Maart 2022 y ta un tarea comun di Hulanda y Aruba

Bista riba economia informal

A base di investigacion lo por haya bista di e grandura di economia informal y por tuma medidanan contra esaki, mescos ta conta pasonan contra trabao ilegal. Pa 15 di October mester tin un inventarisacion di tur investigacion existente, mientras cu pa 1 di December lo mester tin un mapa di tur e problemanan den e infrastructura di informacion y intercambio di data. Pa 15 di Januari 2022, Hulanda y Aruba lo mester tin e plan di accion integral y multianual cla cu ta dirigi pa realisa un economia resiliente.

Pensioen na 66

Pa Maart 1, 2022 lo mester tabatin un rapport cla riba e structura di seguridad social, pa trece e cambionan cu segun e landspakket ta necesario. En todo caso, ta sali di e punto di bista cu e edad di pensioen mester bay na 66 na 2025, alomenos cu investigacionnan mustra cu esaki no ta realistico y cu tin alternativanan cu e mesun efecto presupuestario. Un instituto economico independiente nombra pa COHO, den consulta cu Aruba, lo por riba papel kico ta e efectonan presupuestario pa percura cu pensioennan ta keda pagabel y con e seguridad social lo ta si e edad di pensioen subi pa 66, y eventualmente lo por sigui subi basa riba expectativa di bida. Preparacion pa e topico aki lo bira mas concreto den e siguiente agenda di ehecucion.

Elimina burocracia

Lo optimalisa structura di permiso, baha costo pa haci negoshi y elimina burocracia pa promove empresaria y clima di inversion. Pero pa logra esaki mester revisa tur e leynan relevante y e resultado mester ta cla pa 1 di December 2021. Digitalisacion tambe ta esencial y e servicio y departamentonan crucial mester ta completamente digitalisa pa 1 di Februari 2022. E rapport riba con e proceso ta canando lo ta cla pa 15 di December, y ta responsabilidad di Aruba. Pa 1 di Mei 2022, mester tin un decision di Gobierno pa mehora cobranzanan y cu e aspecto huridico ta na su luga.

E reglanan di e Plan di Ordenanza Teritorial a keda aproba, mientras cu Hulanda y Aruba lo mira con pa mehora e funcionamento di departamento di legislacion y asuntonan huridico pa percura cu tur e proceso legal por cana bon.

LEAVE A REPLY

Please enter your comment!
Please enter your name here