28 oct DT nautical (1).jpg

Dia 29 di october y 30 di october 2016, Aruba Nautical Club lo tene su grandioso torneo di pesca “52nd International Classic Billfish Tournament”.E torneo aki ta wordo organisa anualmente desde 1964.

Awendia e formato di e torneo ta di “Catch & Release”. Esey ta encera cu e pisca cu wordo gara no ta wordo mata y embarca, pero ta wordo laga bek den libertad pa e keda bibo. Esaki ta wordo haci pa preserva y conserva e especie di piscanan concerni. Pa cada pisca cu wordo “released” e piscado ta haya un cantidad di punto.

Na final, e ekipo cu mas punto lo ta e ganado. Ta bay tin boto di Aruba, Corsou y Venezuela. E programa di e torneo lo ta como lo siguiente: diabierna 28 di october: Inscripcion, reunion di capitan y Happy Hour; diasabra 29 di october: Prome dia di pesca; Happy hour atardi. Diadomingo 30 october: Segundo dia di pesca y entrega di trofeo y demas premionan.

Manera semper, lo bay tin tremendo ambiente, entre otro cu musica di DJ Diabierna y Diadomingo atardi. E torneo di Aruba Nautical Club ta un evento pa cualificacion pa e Campeonato Mundial IFGA cu lo wordo teni na april 2017 na Quepos, Costa Rica. Aruba Nautical Club ta invita tur amante di e deporte di pesca y e pueblo di Aruba en general pa asisti na e magno evento aki. Pa mas informacion por fabor tuma contacto cu nos na 585-3022.