E aña aki na juni 2016 Aruba Scholarship Foundation (ASF) ta otorga un cantidad di beca limita na e studiantenan cu kier sigui un estudio den exterior na un instituto di enseñansa superior y cu ta cumpli cu e rekisitonan fiha pa Aruba Scholarship Foundation. Riba website www.arubascholarships.com e interesado ta haya informacion en general tocante Aruba Scholarship Foundation y e rekisitonan necesario pa un candidato bini na remarca pa un beca. E formulario 2016/2017 ta obtenibel na Biblioteca Nacional Aruba na Madurostraat. Tambe e studiante por download e formulario aki, yena esaki corectamente y entrega esaki na Print Media Aruba/4Sale Magazine, Seroe Blanco 20.
Segun regla di ASF, tur studiante cu actualmente tin beca di ASF y cu ta continua cu nan estudio, mester aplica di nobo pa e aña di estudio 2016-2017. Tur interesado mester entrega e formulario menciona y e documentonan rekeri na Print Media Aruba/4Sale Magazine, Seroe Blanco 20, prome cu diabierna 13 di mei proximo.
Aruba Scholarship Foundation tin varios criterio ora e ta evalua e documentonan ricibi di e candidatonan. Esaki ta conta tanto pa e candidatonan nobo como pa esunnan existente. Un di e criterionan cu ta pisa hopi cerca e fundacion ta e necesidad berdadero di ayudo financiero. P’esey e studiante mester por demostra esaki tambe ora e yena e formulario. Aruba Scholarship Foundation ta tuma varios factor di e parti financiero na consideracion. Por ehempel, cuanto e estudio lo costa, e entrada realmente disponibel di e famia, disponibilidad di fondo di otro fuente entre otro, fiansa di estudio di gobierno. E organisacion tambe ta tuma den consideracion loke e candidato mes a y ta haci pa yuda su situacion financiero.
Ta importante y hasta logico cu e instituto y e estudio desea en general mester ta reconoci (acredita) den e pais di studio. Si e studiante tin algun duda tocante e estudio cu e ke sigui of e instituto cu el a scoge, semper ta consehabel pe acerca Departamento di Enseñansa pa guia profesional. Tur studiante cu haya beca mester compromete su mes cu e ta bin traha na Aruba pa mes tanto aña cu el a studia cu beca di ASF. Tambe ta importante cu e studiante tin un bon prestacion na scol secundario, p.e. na HAVO, VWO, EPI, etc. Aruba Scholarship Foundation ta un institucion completamente independiente y no ta afilia na niun otro organisacion. Su sosten financiero ta bin di contribucionnan di e miembronan di nos comunidad, manera di comercio, profesionalnan y otro persona cu ta comparti e vision di un Aruba miho prepara pa futuro. Directiva di ASF ta traha completamente Pro Deo.
