6mei, NP, DRH.JPG

Mirando e cantidad di hendenan (61) cu tin na cas den gobierno aworaki, a puntra hefe di Departamento di Recurso Humano Omaira Lares si a purba pone e grupo di hendenan aki na trabou caba, cu no a resulta. Y kico ta e proceso pa atende cu e grupo di personanan aki cu tin biaha tin hopi aña na cas ta cobra salario tur luna.

El a bisa cu e grupo aki tabata consisti di mas di 100 hende anto pocopoco ta pone nan traha. Tin di nan ta bin bek y tambe sa tin nobo cu ta bin acerca. “Nos tin dos colega cu ta atende cu e grupo aki  pa tempo completo, cual ta encera e intermediacion pa haya otro funcion pa e personanan en cuestion.  Nan ta bay cu nan na diferente departamento, splica nan con pa ta mas activo y tin biaha en berdad nan no ta resulta. Tin biaha pasobra nan gewoon no kier traha, of nan ta haci un problema na e departamento y nan tin cu wordo manda bek, asina tin hopi mas motibo. Tin hopi di nan cu tin otro trabou tambe pero pocopoco ta yegando na nan.”

Sra. Lares a bisa cu nan ta obliga na solicita anto den caso cu despues di 3 yamada, e persona no aparece, ta cuminsa cu procedura disciplinario cual por yega te na retiro.  Mayoria biaha nan ta spanta ora cu e yega asina leu anto nan ta stop di traha unda cu nan ta trahando y nan ta bin. Tin di nan berdad no ta traha pasobra nan ta malo, segun Sra. Lares. “Lamentablemente tin 3 of 4 cu ultimo a fayece pasobra tabata hendenan malo pa hopi tempo.” Tabatin un caso di un persona cu a haya cancer, y ora el a bin bek e ya no por a traha den e funcion di stress cu e tabatin, finalmente e malesa a hibe asina leu cu el a fayece tambe. Tin hende cu ta perde pia pa motibo di sucu, y por imagina cu no ta facil pa pone un hende asina bay traha bek, si  e no ta un trabou cu no ta cuadra. “Sinembargo, caminda cu por haci esaki ta haci’e. Manera tin un Sra. Cu ta traha na DRH mes cu sucu a afecta su wowo. A percura pa via FAVI a haya  mashinnan corespondiente pa el a bin traha bek.” Pues e posibilidad pa cambia di funcion y haya uno adecua ora cu ta malo t’ey, pero mester sa kico ta e problema.”

Riba 250 vacatura habri
Bayendo bek riba nos articulo publica dia 4 di mei unda cu ta mustra e cantidad halto di vacatura habri cu tin den gobierno, a puntra Sra. Lares con esakinan a wordo crea. El a splica cu tin diferente motibo, nos pais ta crece, nos necesidad pa duna servicio ta crece anto esey kiermen cu e formacion den un organisacion tambe mester crece. Un ehempel  ta Censo, nos tur sa cuanto e servicio na Censo mester ta. Antes tabatin tiki hende ta traha na balie, aworaki door di organisa e trabou mas miho, ta haya cu mester mas hende cu ta traha na balie pa por duna e servicio mas lihe, y esey a sosode tambe. Por mira tambe na e Oficina auxilia di Gobiernonan. Pues di un banda e calidad y cantidad di servicio mester crece cu ta exigi crecemento na cantidad di hende, el a splica.

Den un periodo di tres aña tabatin un totalidad di personal cu a baha di casi 400 hende, pa motibo di VUT, edad di pensioen cu a wordo yega y personal nos  wordo reemplasa, hendenan cu a kita of wordo kita, fayecimento. E cifranan ta mustra cu tin por lo menos 10 pa 15 hende cu ta wordo kita for di trabou pa motibonan disciplinario pero tambe tin un cantidad entre 10 pa 15 pa aña cu ta fayece.  “Tur e personanan aki hopi biaha no ta wordo reemplasa. Prome ta wak e funcion y ta wak a base di esey con ta yena esaki interno, p’esey tin un cantidad grandi di vacatura habri.

Si tene cuenta e ora cu tin 61 persona no activo, di cual 41 a wordo invita pa aplica pa solicita pa trabou na e “job fair” cu ta bay tin dia 10 di mei. Y cu ta solamente empleadonan publico por solicita, logicamente no ta bay yena tur e vacaturanan. Sra. Lares a bisa esaki ta corecto pero locual cu ta purba haci ta laga un persona haci poco mas. Por ehempel si mester di un bode, por laga e conciërge mes haci e trabou di un bode. Hopi vacatura tambe no por bisa cu ta real, pasobra e departamentonan ta notifica esaki, por ehempel nan mester 5 forsa administrativo, pero nan ta ricibi dos pa atende cu e trabounan. Pues ora cu e departamento describi e formacion completo di e departamento (cual ta wardando pa wordo gekeur) por haya un bista real pa por sigui.

Terminando Sra. Lares a bisa cu e prome paso pa yuda  pa haya e personal cualifica ta, pa wak e trabou y ocupacion, cual ta haciendo aworaki. A manda pidi e lista aki di tur e departamentonan y ta mira a base di kico nan ta pidi hende extra. Ta kere cu pocopoco yegando mas cerca di e departamento ta haya sa e cantidad di personal cu nan realmente mester.

LEAVE A REPLY

Please enter your comment!
Please enter your name here