Si no tabata existi e palabra ‘impasse’ anto politica na Aruba lo a invent’e den e situacion actual. Nos ta observa varios ‘move’ di varios banda, pero realmente no tin avance den direccion di un salida politico, cu scapamento di cara di ambos banda. Nos ta na un siman di e sucedido den parlamento, unda mas cu cualkier otro cos nos parlamento a proba di ta un organismo cu no a construi su propio reglanan di oro pa loke ta e manera con ta atende asunto di peso.
Claro cu e sala di reunion di Staten ta keda un scenario politico na promer lugar, unda argumenta y maniobra ta di suma importancia, basta esey ta sucede dentro di limite di e reglanan. Y cu tin hende cu lo bay en busca di e limitenan ey, y ta conta cu su adversarionan ta menos alerto, y ta duna oportunidad pa pusha cosnan mas leu cu realmente por, ta parti di e arte di politica. Loke den nos sistema ta haci falta, ta e consenso di kico ta posible y kico no. Pa loke ta e caso di siman pasa, mester ta obvio cu no mester tabatin henter e discusion cu a sigui pa loke ta e forma con e decision a yega na nace; e manera cu kier a tumba un ministro no ta digno di un parlamento cu ta respeta su mes, y otronan.
Y den esaki nos mester bisa cu nos a spera un posicion mas di principio di nos Promer Ministro, cu pa varios dia tabata ausente riba scenario oficial, pa finalmente aparece y cuminza cu bisa cu e no ta opina riba legalidad of no di e mocion aproba. Esey ta parce un posicion masha inteligente, pero cu en realidad ta bisa cu e no tabata por a apoya sin mas e posicion di su colega di partido presidente di Staten. Cu despues nos por a tende cu den seno di partido sí el a duna apoyo na e posicion di su fraccion den Staten, bon mira ta irelevante, esey ta mas pa consumo interno di e partido, pero no pa opinion publico en general. Pa hopi hende, sigur esnan cu conocimento di e procesonan cu mester tuma lugar den posible retiro di un mandatario, ta mas cu obvio cu nos promer mandatario tin dos problema, cu ta relaciona: uno, e no por formula un decreto di retiro basa riba e mocion aproba di manera ilegitimo, y dos; e no por hiba esaki pa haya firma di Gobernador. E unico alternativa cu ta keda, ta cuminza cu un campaña di difamacion di e mandatario en cuestion, y por cierto nos ta haya e promer señalnan di esey. Nos no ta bisa si cu e instruccionnan pa esaki ta bin di seno di conseho di ministro, pasobra fanaticonan di cualkier partido nunca mester di tanto instruccion pa cuminza coba den pasado. Di otro banda, nos no t’ey pa defende ningun ministro pa loke nan a haci den pasado ni actualmente; nan mes ta grandi bastante pa haci esey.
Nos mester nos atencion pa algo otro, y esey ta con cos a yega asina leu, cu e unico ministro cu a bisa cu e ta kibra cu e politica tradicional di nepotismo, clientelismo, etc., ta haya e tipo di contratiempo aki di casi tur su coleganan ministro. No ta bay cu nos ta kere e ministro aki riba su palabra; nos lo bisa: “Nos ta aprecia loke ta bo intencion, pasobra esey nos mester sikiera tende di bo coleganan, pero manera semper, nos lo huzga bo pa bo actonan, y no pa loke bo ta papia.” Nos ta apenas den e promer lunanan di actuacion di e ministro aki, y ya caba el a bira enemigo mortal di su coleganan? Y cu por lo visto nan ta haya apoyo di e promer mandatario tambe? Unda el a keda pa duna un opinion balanza cu bo mester por spera di su persona? No ta el a profila su mes como e ‘Mama di Aruba’ den e crisis di coronavirus y probablemente e ‘pick up’ basta voto cu esey tambe pa otro aña? Pakico ta yuda pinta e imagen di un mandatario ‘destructivo’ cu ta trata di tur manera di kibra e ‘harmonia’ cu ta reina den seno di conseho di ministro? Ta asina bon mucha e resto ta? Pakico e no ta cuminza puntra su colega di Husticia ta ki idea e tin cu firmamento di e acuerdonan encuanto RST y otro formanan di colaboracion hudicial den Reino, loke by the way Hulanda a pone como condicion pa nos yega na un acuerdo y haya e financiamento cu nos mester urgentemente? O e ta di opinion cu ta interes general e ministro aki ta sirbi, bloqueando cooperacion cu ta importante pa combati criminalidad internacional, unda hasta e otro islanan a bay di acuerdo caba, mientras cu nan tin e fama di ta mas fastioso cu nos? Con ta para cu e punto aki por ehemplo den e supuesto negociacion cu Hulanda, di cual nos no ta tende nada mas, mientras ta exigi nos atencion pa algo asina burdo manera e actual conflicto aki? Pakico nos tin e impresion cu gobierno ta contento cu e actual turbulencia, envez di atende e asuntonan di peso cu ta nos interes?
