Ayera comunidad a haya e noticia lamentabel di un otro persona cu a fayece den un accidente di trafico na unda cu a bira conoci cu e persona aki tabata yiu y ruman di dos persona cu ta traha den prensa.
Ayera merdia, Cuerpo di Polis di Aruba mediante un comunicado di prensa a informa cu diadomingo ultimo dia 2 di juli den oranan di madruga despues di 1:00am, central di polis a haya e notificacion di un accidente frontal na altura di Sonrisa na Pavia.
Na yegada di patruya ta bin encontra cu dos auto cu a dal frontal den otro. Ambos chauffeur di tur dos auto tabata den estado critico.
Patruya ta pidi pa ambulance cu maximo urgencia, na unda cu na e sitio di e sucedido a presenta ambulance, rapid responder como tambe brandweer. Na yegada di ambulance a stabilisa ambos chauffeur y a bay cu ambos chauffeur cu maximo urgencia pa hospital.
Polis di trafico como tambe polis tecnico a presenta na e sitio pa haci nan investigacion.
Lamentablemente ayera merdia a drenta e noticia cu pa 12:18pm Dr.Vera a constata morto di Adelizah Sherrylane Richanella Vrolijk, un hoben naci na Aruba cu den proximo dia specificamente dia 8 juli lo a cumpli su 38 aña. Vrolijk tabata un persona conoci den mundo di prensa ya cu e tabata yiu di Anselmo Vrolijk, ruman di Andrew Vrolijk y Jeremy Vrolijk, ken ta forma parti di e personal di Telearuba.
Slachtofferhulp tambe a presenta na e hospital pa brinda sosten na famia di e fayecido. Bon Dia Aruba y Cuerpo Policial ta manda palabra di profundo condolencia y forsa na famia di e fayecido.
